Read Alur Yob 40 Bible Online

Yob 40 - Alur bible

Yob 40

¹Mange ke Yehova loko lembe ni Yob, man ewacu kumae,

²Ng’atu m’upiemo bi-ii ku Jategokpo? Ng’atu m’upiemo ku Mungu, wek elok ire lembe.

³E Yob ulund uloko lembe ni Yehova, man ewacu kumae,

⁴Nen, an a gin moko ngo; abiloko ang’o iri? Aketho cinga wi dhoga.

⁵Wang’ acel ayero, man abiloko lembe ngo; Eyo, wang’ ario, ento abicidho ku lembe kendo ngo.

⁶Yehova lund uloko lembe ni Yob kud i atido, man ewacu kumae,

⁷Twi pieri kawono calu nico: Abilwong’o i beng’i, man iyer ira.

⁸Ibithiro cil lembapoka para? Ibigonja, kara lembe m’i wii kabre woko?

⁹Kadi ibedo ku bot ma calu Mungu? Icopo mor ku dwal calu eni?

¹⁰Rukri giri kawono ku dit man kero; Man ironjri giri ku yung man dwong’.

¹¹Konj ng’ecwiny peri m’usagre woko; Man inen wi dhanu ceke kubang’gi kubang’gi ng’atu ma jakuhaya, man ijwige.

¹²Nen wi dhanu ceke kubang’gi kubang’gi ma jakuhaya, man ijwige piny; Man inyon judubo ku ka ma gicungo i ie.

¹³Pan-gi i utur karacelo; Twi wang’gi i ka m’aponda.

¹⁴E an bende abituco piri Nia cingi ma yor acwic copo bodhi.

¹⁵Nen kawono, rau, m’atimo karacelo kudi; Ecamu lum calu koni dhiang’.

¹⁶Nen kawono, tego pare ni i piere Man tego pare ni i ler m’i ie.

¹⁷Ewico yibe calu musonge: Fuc m’i bambe ribre karacelo.

¹⁸Cogone calu soro mi mola; Tiende calu ng’et nyunyu.

¹⁹En e jadit mi yo pa Mungu: Ng’atu m’ucwie mio ire palamularu pare.

²⁰Andha gudi wodho ire cemo, Ka ma yedi ceke m’i thim tuko.

²¹Evuto the yen m’uluk, I kapondo mi kolo, man usi.

²²Yen m’uluk urae ku tipogi; Mbegu m’i kulo gitieke gbur.

²³Nen, tek kulo core hau, kume miel ungo; Ebedo ku genogen, kadok Yordan upong’ cil i dhoge.

²⁴Ng’atu moko bimake kinde m’eneno, Kadi ma bicobo ume ku ngbaki?