Read Alur Yob 42 Bible Online

Yob 42 - Alur bible

Yob 42

¹Yob ulund uloko lembe ni Yehova, man ewacu kumae,

²Ang’eyo nia icopo timo gin ceke, Man nia jucopo cero lembakeca peri moko ngo.

³Maeni ng’a m’upanu lembapora ma ng’eyong’ec umbe? Ka kumeno aweco gin m’ang’eyo there ngo, Gin ma wang’u ijo m’usagu ira, m’ang’eyo ngo.

⁴Winji, akwei, e abiweco; Abilwong’o i beng’i, man iyer ira.

⁵Naka awinjo piri ku winj mi ith; Ento kawono wang’a neni:

⁶Kum kumeno adagra gira, Man aloko cwinya i utur man vuru.

⁷Ebedo kumeno, nia, yo ng’ei lembe maeni ma Yehova yero ni Yob, Yehova wacu ni Elifaz ma Jatemani kumae, Kwinyo para opo i kumi, man kum jurimbi ario; kum wuyero gin m’atira ngo pira, calu jatic para ma Yob uyero.

⁸Ka kumeno kawono, wugam thwoni dhiang’ abiro iwu man nyogi rombe abiro, man wucidh ba jatic para ma Yob, man wuthier lam m’awang’a piwu giwu; man jatic para ma Yob bikwayu piwu; kum abiyio en, kara kud atim i kumwu calku kasegu mu; kum wuyero pira gin m’atira ngo, calu jatic para ma Yob uyero.

⁹Kum kumeno Elifaz ma Jatemani man Bildad ma Jacuhi man Zofar ma Janamathi gicidho, man gitimo calu Yehova ng’olo igi: e Yehova jolo Yob. Yehova Dwoko Mierolembe pa Yob

¹⁰E Yehova loko ng’eca pa Yob, kinde m’erwo pi jurimbe: man Yehova mio yau piny ma yang’ Yob ubedo ko wang’ ario ire.

¹¹Utumin mire ceke gilund gibino i bang’e, man nyimin mire ceke, ku dhanu ceke ma naka gibedo i lela pare, man gicamu kwen karacelo kude i ot pare: e giywage, man gijuke kum lem ma rac ceke ma Yehova kelo i wie: man ku ba dhanu ceke bende ng’atuman umio ire ng’et mola ma tar man ku ba dhanu ceke ng’atu man lagith mi mola ma kwar.

¹²Kum kumeno Yehova mio mugisa wi kajik pa Yob ma sagu thekrine: man ebedo ku rombe rubanga apar wi ang’wen, man ngamia rubanga abusiel, man mberembere mi koni dhiang’ rubanga acel, man mege kana rubanga acel.

¹³Ebedo ku wote abiro bende man nyige adek.

¹⁴Man elwong’o nying’ ma kwong’ane Yemima; man nying’ mir arionde ke Kezia; man nying’ mir adege ke Kerenhapuk.

¹⁵Man i ng’om ceke mon moko mbe ma junwang’u wang’gi leng’ calu nyig Yob: man weggi mio igi aba i kind uturneggi.

¹⁶Man yo ng’ei maeni Yob ucamu ng’om rundi dak acel ku pier ang’wen, man eneno wote, ku wot wote, en e dhanum’utuk ang’wen.

¹⁷Kum kumeno Yob utho, m’eti m’epong’ kuceng’ de.