Read Alur Yob 5 Bible Online

Yob 5 - Alur bible

Yob 5

¹Lwong’ kawono; ng’atu moko nuti ma biloko iri lembe? Man ibilokri ba ju ma leng’ ma kani?

²Kum ng’ecwiny ketho jakasegu tho, Man nyeko ketho ng’atu ma kite mbe tho.

³Aneno jukusegu beguro ulaggi: Ento akwong’o kabedo pare pio pio.

⁴Nyithindho pare gi bor ku bedo museme, Man junyonogi i dhugang’, Kadok ng’atu raoko m’ubodhgi de mbe:

⁵Ma mwoka migi ju ma kec unegogi gicamu, Man gigame cil kud i ukudho; Man uwic ung’amu dhoge ni jupiny migi.

⁶Kum kier uai kud i utur ungo, Kadok can de ai i ng’om ungo;

⁷Ento junyolo dhanu ni can, Calu bieimac thore.

⁸Ento an, ayenyo ayeny ba Mungu, Man ayenyo aketh lembe para ba Mungu;

⁹M’utimo gin ma dwong’ ma yenjre de ngo, Gin ma wang’u ijo ma welne mbe:

¹⁰M’umio koth wi ng’om, M’uoro pi wi pothi;

¹¹Ketho nia edodo ju ma gini piny malu, Man judodo ju m’uywak museme.

¹²Enyotho lembapora mi ju ma riu, Ketho nia cing’gi copo timo gin ma gikeco ngo.

¹³Emaku jurieko i riu migi; Man juredho lembapora mi ju ma riu piny.

¹⁴Girombo ku mudho ku dieceng, Man gimulo piny ku dieceng’ calu ku diewor.

¹⁵Ento ebodho ni palamularu m’i dhoggi, En e jacanpiny kud i cing’ jutego.

¹⁶Kum kumeno jucan ubedo ku genogen, Man kier umio dhoge.

¹⁷Nen, ng’atu ma Mungu juko en e jamutoro: Ka kumeno kud icai ponji pa Jategokpo.

¹⁸Kum, eketho rem, man etwio; Etong’o lero, man cinge cangu.

¹⁹Ebibodhi i can abusiel; Eyo, i abiro lem ma rac moko mbe ma bimulo kumi.

²⁰I ndru ebiweri ni tho; Man i lwiny ni tego mi palamalaru.

²¹Ibibedo apana ni goc mi leb; Kadi ibilworo nyoth ungo kinde m’ebino.

²²Ibing’iero nyoth ku ndru; Kadok lworo de binegi ngo kum yedi m’i ng’om.

²³Kum kindwu biripo ku kidi mi podho; Man kindwu bipoto ku yedi m’i thim.

²⁴Man ibing’eyo nia hema peri ni i kwiocwiny; E ibiliewo dwol peri, man ibinwang’u moko rwinyo ngo.

²⁵Ibing’eyo bende nia kodhini bibedo dit, Man nyikwei calu lum m’i ng’om.

²⁶Ibibino ba liel peri i tio, Calu kumna cam bino i nindone.

²⁷Nen maeni, wayenye, ebedo kumeno; Winj maeni, man ing’eye pi bero peri.