Read Alur Yob 6 Bible Online

Yob 6 - Alur bible

Yob 6

¹E Yob ulund uloko lembe man ewacu kumae,

²A tek juporo can para ku jampor, Man juketho ruvwa para ceke i mukero mire!

³Kum kawono kuno di edoko pek ma sagu kwio mi nam: Ka kumeno lembe para bedo vur vur.

⁴Kum athero pa Jategokpo ni yor i ia, Tipona madhu kwirne: Ndiri pa Mungu thero i kuma.

⁵Kana m’i thim ywak kinde ma lum nuti ire? Kadi koni dhiang’ ywak wi cam pare?

⁶Jucopo camu gin ma midone mbe umbe kadu? Kadi mido moko nuti i urepu tong’gweno?

⁷Ng’eyong’ec para kwero mulogi; Gi calu cemo ma judagu ira.

⁸A tek acopo bedo ku yeny ma ia yenyo; Man tek Mungu mio gin m’aketho cwinya i kume mire!

⁹En e nia ebed ber ni Mungu ya enyona; Man nia ekab cinge, man ethuma cen mire!

¹⁰Man wek ebed juk para asu, Eyo, wek ahaira i remokum ma kwio ngo, Nia akwero lembe pa Ng’atu Maleng’ ungo.

¹¹Ang’o ma tegona, ma nia akuri? Man kajikna en e ang’o, ma nia atwi cwinya?

¹²Tegona en e tego mi kidi? Kadi ring’kuma en e mi mola?

¹³En e kum kony moko mbe i ia ngo, Man nia juriemo rieko kud i bang’a ngo?

¹⁴Maku jarimb ng’atu m’uvoc unyuth ire bedo ber ku dhanu; Tek kumeno ngo emaru weko lworo pa Jategokpo.

¹⁵Utumira gitimo kud abombi calu kulo, Calu yo mi kulo ma kadhu woko;

¹⁶M’ubedo col ni kum pei, Man ka ma pei pondo i ie;

¹⁷I nindo ma kumgi mure i ie, e girwinyo; Kinde ma lietho nuti, ginyothri kud i kakagi.

¹⁸Juwoth m’uwotho dhu yo i vutgi gilokri cen; Giidho malu i langa, e girwinyo.

¹⁹Juwoth mi Tema gineno, Njuru dhanu pa Ceba gikurogi.

²⁰Lewic umakugi kum gigeno; Gicidho keca, e ewinygi ng’abre.

²¹Kum kawono wun wu gin moko ngo; Wuneno jam ndiri, e lworo negowu.

²²Awacu kumae, Mi ira? Kadi, Thier giramia mi piny mu ira?

²³Kadi, Bodha ni cing’ jasendi? Kadi, Wara ni cing’ weg avoci?

²⁴Ponja, e abiling’; Man keth ang’ei ka m’akier i ie.

²⁵Lembe mi bedo atira gi tek mire! Ento juk mu, ejuko ang’o?

²⁶Wupido ya wujuk lembe, Kum wec pa ng’atu m’udoko tipo gi calu yamu?

²⁷Eyo, wuyenyo wugoi gagi wi kic, Man wutim kuloka kum jarimbwu.

²⁸Ka kumeno kawono ebed ber iwu ya wunena; Kum andha abicwayu ndra ngo i weng’wu.

²⁹Wudwogi, akwayuwu, kud wuyi bedopwe m’umbe bed nuti; Eyo, wudwog kendo, lembe para e pwe.

³⁰Bedopwe m’umbe nuti i leba? Girabila para copo ng’io gin mi ndra ngo?