Read Alur Yob 7 Bible Online

Yob 7 - Alur bible

Yob 7

¹Lwiny umbe ni dhanu m’i ng’omi? Man ceng’ pare calu ceng’ pa jatic mi sukulia ngo?

²Calu jatic ma geno tipopiny hai, Man calu jatic mi sukulia ma kio sukulia pare:

³Kum kumeno juketho abed won dwi mi masendi, Man jung’olo ira diewor mi olo.

⁴Kinde m’avuto piny, awacu kumae, Abiai awene, man diewor bithumi? Man apong’ ku lokri kun ku kun cil ma piny uru ko.

⁵Ring’kuma ronjre kud ukoko man ng’om m’ung’indre; Dendkuma jung’, man ethumbre kendo.

⁶Ceng’ para kadhu pio ma sagu jamcwic pa jacwibongu, Man gilal ma genogen umbe.

⁷A poi nia kwo para en e yuyo: Wang’a bineno gin ma ber kendo ngo.

⁸Wang’ ng’atu m’unena binena kendo ngo; Weng’i bibedo i kuma, ento abibedo nuti ngo.

⁹Calu afuru duny man erwinyo woko, Kumeno ng’atu m’uloro piny i liel biidho malu kendo ngo.

¹⁰Ebidok kendo ngo ba ot pare, Kadok kakare de bing’eye kendo ngo.

¹¹Ka kumeno abicero dhoga ngo; Abiweco i ndiba mi tipona; Abiywak i kec mi ng’eyong’ec para.

¹²An a nam, kadi yedi m’i nam, Ma nia iketh jakur i wia?

¹³Kinde m’awacu kumae, Kavuto para bijuka, Kavuto para bidwoko ywak para yot;

¹⁴E ilund inyayu ndiri i ia ku lek, Man idwoka tipo ku ginmawokiwang’:

¹⁵Ketho nia ng’eyong’ec para foyo dec, Man tho ma sagu cogona maeni.

¹⁶Adagu kwo para; ayenyo ngo abed kwo awe: Weka; kum ceng’ para en e mananu.

¹⁷Dhanu en e ang’o, ma nia iyunge, Man nia iketh pidoii i kume,

¹⁸Man nia iliewe ku ba rupiny ku ba rupiny, Man imul ie ku ba kind nindo ceke?

¹⁹Ibiweko nena rokani, Kadi ibiweka a kenda ngo maram amwony ko lau dhoga?

²⁰Tek adubo, atim ang’o i beng’i, E in i jakur dhanu? Nedi iketha ni abotbot iri, Ketho nia an a ter ira gira?

²¹Man nedi iweko gondri para woko ngo, man ikab kier para woko? Kum kawono abivuto piny i utur; Man ibiyenya kud amora, ento abibedo mbe.