Read Alur Yob 8 Bible Online

Yob 8 - Alur bible

Yob 8

¹E Bildad ma Jacuhi lund uloko lembe, man ewacu kumae,

²Ibiweco gin maeni rokani? Man lembe m’i dhogi bibedo calu yamu ma tek rokani?

³Mungu nyo tho pokolembe? Kadi Jategokpo nyotho bedopwe?

⁴Tek nyithindho peri gidubo ire, Man emiogi i cing’ gondri migi;

⁵Tek iyenyo iyeny ba Mungu kud amora, Man itim kwac peri ba Jategokpo;

⁶Dok ii leng’ man atira: Kuno di kawono eceu piri andha, Man kuno di eketho kabedo mi bedopwe peri bedo miero.

⁷Man kadok thekri peri e nok, Ento kuno di kajik peri nyai dit.

⁸Kum penj, akwei, pi dhanum’utuk ma kwong’a, Man keth cwinyi kum gin ma kwarugi yenyo

⁹(Kum wa dhanu ma nyaworo kende, man wang’eyo gin moko ngo, Kum ceng’ mwa ma wi ng’om en e tipopiny);

¹⁰Gibiponji ngo, man gibiyero iri ngo, Man gibiweco lembe kud i adundegi ngo?

¹¹Kolo copo twi m’umbe codho? Usi de copo twi m’umbe pi?

¹²Kinde ma fodi e numu, ma fodi juthume ngo, Elar ener ni uboko ceke.

¹³E yo mi dhanu ceke ma wigi wil kum Mungu bedo kumeca; Man genogen pa ng’atu ma ayi Mungu mbe i kume birwinyo:

¹⁴Ma genogen pare bitur ngik, Man ma genogen pare en e giracwia mir avaceng’.

¹⁵Ebijengre kum ot pare, ento ebicungo ngo: Ebimaku kume, ento ebibedo ngo.

¹⁶E numu i wang’ ceng’, Man thwoke dhenjre wi podho pare.

¹⁷Ulage gapre kum udhuru mi kidi, Eneno ka kidi.

¹⁸Tek enyothre kud i kakare, Ebilund kwere kumae, Aneni ngo.

¹⁹Nen, maeni en e mutoro mi yo pare; Man mange bitwi kud i ng’om.

²⁰Nen, Mungu bibayu ng’atu ma ndhu cu ngo, Kadok jutimrac de ebijengogi ngo.

²¹Fodi ebipong’o dhogi ku ng’iero. Man dendhogi ku kok.

²²Ju m’udegi bironjri ku lewic; E hema mi judubo bibedo mbe kendo.