Read Alur Yob 9 Bible Online

Yob 9 - Alur bible

Yob 9

¹Yob ulund uloko lembe man ewacu kumae,

²Andha ang’eyo nia ebedo kumeno: Ento dhanu copo bedopwe ku Mungu nenedi?

³Tek ebedo ber ire ya gi-ii gikude, Ecopo loko lembe ngo ire acel mi rubanga.

⁴E riek i cwiny, man e ratego i tego: Ng’a ma dwoko cwinye tek i kume, man lembene bedo miero?

⁵En m’edaku gudi kamange, e ging’eyo maeni ngo, Kinde m’eng’ielogi i ng’ecwiny pare;

⁶M’eyengo ng’om kud i kakare, Man mbegine miel;

⁷M’eng’olo ni ceng’, e ewok ungo, M’emwono kum cero de;

⁸M’erieyo i polo e kende, M’enyono wi mukura m’i nam de;

⁹M’etimo Yung’ni, kud Ukwaidhok, man Nyakaluku, Ku kusika ma yor ariwa ma piny;

¹⁰M’etimo gin ma dwong’ ma yenjre ngo, Eyo, gin ma wang’u ijo ma welne mbe.

¹¹Nen, ekadhu kud i ng’eta, man anene ngo: Ekadhu akadha bende, ento ang’ie ngo.

¹²Nen, emaku ayeki, ng’a ma copo cere? Ng’a ma biwacu ire kumae, Itimo ang’o?

¹³Mungu bikabu kwinyo pare ngo; Ju m’ukonyo Rahab gigung’ the tiende.

¹⁴E ka an ke abiloko lembe ire nenedi, Ma nia afoi lembe para ma wapid ko wakude?

¹⁵Ma, kadok a pwe de, kuno di aloko lembe ngo; Kuno di akwayu japoklembe para.

¹⁶Tek alwong’o, man eloko ira lembe, Kuno di ayio ngo nia ewinjo dwanda.

¹⁷Kum ethora ku wavuvu, Man emedo lero para ma lembe mbe.

¹⁸Eyio ira ngo ya ayui, Ento epong’a kud adra.

¹⁹Tek waweco pi tego, nen, en e ratego! Man tek waweco pi pokolembe, Ng’a ma biketho titi i wia, ewacu?

²⁰Kadok abed pwe, dhoga gira bigonja: Kadok abed ndhu cu, ebinyutho nia kita mbe.

²¹Abedo ndhu cu; aparu pira gira ngo; Adagu kwo para.

²²E ceke acel; ka kumeno awacu kumae, Enyotho ma ndhu cu ku ma judubo.

²³Tek goc nego dhanu pio, Ebicayu muloic mi ju ma lembe mbe i wigi.

²⁴Jumio ng’om i cing’ judubo; Eumo wang’ jupoklembene: Tek en e en ungo, en e ng’a?

²⁵Nie ceng’ para ringo pio ma sagu jakwenda: Giringo, gineno gin ma ber ungo.

²⁶Gikadhu cen calu combo ma ringo pio; Calu acur ma yudho ayeki.

²⁷Tek awacu kumae, Wia biwil kum ywak para, Abiwanyu wang’a mi can, man abibedo ku tegocwiny;

²⁸Lworo nega kum can para ceke, Ang’eyo nia ibiwacu ngo nia lembe mbe i wia.

²⁹Abibedo agonja; Nedi asendra mananu?

³⁰Tek ajom gira ku pi mi pei, Man adwoko cinga leng’ njwa.

³¹Ento ibiroya i ora, Man kendi para ma dhe bidaga.

³²Kum en e dhanu ungo, calu an, ma nia alok ire lembe, Ma nia wabin karacelo ba pokolembe.

³³Jacung kum lembe mbe i kindwa, Ma kuno uketho cinge i wiwa wan ario de.

³⁴Wek ekab ukede pare kud i bang’a, Man ndiri pare kud unega ku lworo:

³⁵Tek ebedo kumeno kuno di aweco, man lworo nega ngo i kume; Kum abedo kumeno ngo i ia gira.