Read Alur Zaburi 10 Bible Online

Zaburi 10 - Alur bible

Zaburi 10

¹Nedi icungo bor cen, E Yehova? Nedi ipondo giri i nindo mi cani?

²Juriemo jucan ni kum kuhaya mi judubo; Wek jumakgi i lembrieko ma igi pido.

³Kum jadubo lule kum yeny ma rac ma adunde yenyo, Man emio mugisa ni ju m’uketho cwinygi hai kum piny, ento ecayu Yehova.

⁴Jadubo wacu kumae, ku kuhaya mi wang’e, Ebilwong’e ngo. Pidoic pare ceke kumae, Mungu mbe.

⁵Yo pare rac thiri thiri: Pokolembe peri ni bor ku malu ma nen ire ngo: Jusend pare ceke, ecayugi.

⁶Ewacu i adundene kumae, Lembe moko mbe ma bidieng’o cwinya; Ruvwa bikwanya ngo ku ba dhanum’utuk ceke.

⁷Dhoge pong’ ku kwong’ kud abombi man kuvuga: Ndre ku kier ni the lebe.

⁸Ebedo i ka ma jukanu ie adhi mi pacu; Enego ng’atu ma dubo mbe kude i ka m’aponda:

⁹Eketho wang’ ling’ ling’ kum ng’atu ma ng’ic.

¹⁰Epondo i ka ma ling’ calu umvor i kagonjo pare; Ekanu adhi kara emak jacan: Emaku jacan, kinde m’epeye i voi pare. Eriebre, egung’ piny, E ju ma ng’ic podho ni kum ju ma tek pare.

¹¹Ewacu yor i adundene kumae: Wi Mungu wil. Epanu wang’e, ebineno lembene ki ngo.

¹²Ai, E Yehova; E Mungu, ting’ cingi malu: Wii kud uwil kum jacan.

¹³Nedi jadubo cayu Mungu, Man ewacu i adundene kumae, Ibilwong’e ngo?

¹⁴Ineno maeni; kum ineno ndre ku lem ma ton ijo, kara ilwong’e ku cingi: Ng’atu ma ng’ic mire gire iri; Ibedo jakony kic.

¹⁵Tur bot jadubo; Man pi ng’atu ma rac, yeny dubo pare cil m’ethum ko.

¹⁶Yehova en e Ubimo mi nja ku nja: Thek urwinyo kud i ng’om pare.

¹⁷Yehova, iwinjo yeny ma ju ma mol uyenyo: Ibiyiko adundegi, ibiketho ithi winjo;

¹⁸Kara ipok lembe mi kic ku ju ma jusendogi, Kara dhanu ma en e mi ng’om kud ubed ni ung’oindiri kendo.