Read Alur Zaburi 102 Bible Online

Zaburi 102 - Alur bible

Zaburi 102

¹Winj rwo para, E Yehova, Man wek ywak para bin i beng’i.

²Kud ipan weng’i ira i ceng’ mi can para: Cik ithi i bang’a; I ceng’ m’alwong’o lok ira lembe pio.

³Kum nindo para thum calu yiro, Man cogo para wang’ calu dhumac.

⁴Jugoyo adundena calu lum, man ener; Kum wia wil kum camu kwen para.

⁵Kum dwal mi cur para Cogona moko kum ring’kuma.

⁶An a calu alungu m’i langa: Adoko calu tula mi ka ma ngele.

⁷Akuro, man adoko calu kira M’ubedo kende wi ot.

⁸Judegina gicaya ceng’ du; Ju ma kwinyo negogi i kuma gikwong’o kuda kwong’.

⁹Kum acamu vuru calu kwen, Man ajebo giramadha para ku ywak;

¹⁰Kum ng’ecwiny peri man kwinyo peri: Kum iting’a malu, man ibaya.

¹¹Ceng’ para calu tipopiny ma loro; Man aner calu lum.

¹²Ento in, E Yehova, ibibedo mi nja; Man nyingi mi poi cil kum dhanum’utuk ceke.

¹³Ibiai, man kisa binegi kum Sayuni; Kum en e nindo ma ngisi negi ie kume, Eyo, nindo ma jung’olo wok.

¹⁴Kum anyong’a nego jutic peri kum kidi pare, Man ngisi negogi kum utur pare.

¹⁵Kum kumeno thek bilworo nying’ Yehova, Man ju m’ubimo ceke m’i ng’om bilworo dwong’ peri.

¹⁶Kum Yehova gomo Sayuni; Ewok i dwong’ pare;

¹⁷Eneno rwo mi ju ma kendgi, Man ecayu rwo migi ngo.

¹⁸Maeni bigore ni dhanum’utuk ma bi bino; Man dhanu ma jubicwiogi gibipaku Yehova.

¹⁹Kum eneno piny ku ka ma malu mi kamaleng’ pare; Yehova neno ng’om kud i polo;

²⁰Kara ewinj cur pa jakol; Kara egony ju ma juketho mi tho;

²¹Kara dhanu yer nying’ Yehova i Sayuni, Man pak pare i Yerusalem;

²²Kinde ma kodhidhanu cokri karacelo, Man ker, kara gitim ni Yehova.

²³Esenda ku tego pare i gengi; Ejwigo nindo para.

²⁴Awacu kumae, E Munguna, kud ikaba woko i die nindo para: Rundi peri tundo kum dhanum’utuk ceke.

²⁵Itheko thepiny mi ng’om con; Man polo en e tic mi cingi.

²⁶Gibithum, ento ibibedo; Eyo, kagi ceke gibiti calu kendi; Ibilokogi calu kanzu, e gibilokri;

²⁷Ento ibedo cal acel, Man rundi peri kajikne mbe.

²⁸Nyithindho mi jutic peri gibibedo asu, Man kodhigi bicungo tek i weng’i.