Read Alur Zaburi 103 Bible Online

Zaburi 103 - Alur bible

Zaburi 103

¹E ng’eyong’ec para, mi mugisa ni Yehova; Ku gin ceke ma ni i ia, mi mugisa ni nyinge ma leng’.

²E ng’eyong’ec para, mi mugisa ni Yehova, Man wii kud uwil kum timober pare ceke:

³M’eweko ko kier peri ceke woko; M’ekeyo ko tho peri ceke ma kwonde tung’ tung’;

⁴M’ewaru ko kwo peri kud i nyoth; M’eroyo ko jamkermiwic mi mer mi bero ku kisa ma ng’ic i wii;

⁵M’eketho ko yeny m’iyenyo timbre ku gin ma ber, Kara awobini dok nyen pamir acur.

⁶Yehova timo tic ma pwe, Ku pokolembe mi ju ma jusendogi ceke.

⁷Eketho Musa ng’eyo yo pare, Tic pare ke ni nyithindho mir Israel.

⁸Yehova en e won kisa ku bero, Ng’ecwiny make pio ngo, man e dit i mer mi bero.

⁹Ebijai du ngo; Kadok ng’ecwiny pare de ebiciro nja ngo.

¹⁰Etimo iwa calku dubo mwa ngo, Kadi emio sukulia iwa de ngo calku kier mwa,

¹¹Kum calu polo bedo malu wi ng’om, E mer mi bero pare bedo dit kumeno wi ju m’ulwore.

¹²Calu yo nyangu bedo bor ku yo reto, E ecoro kier mwa bor kumeno kud i kumwa.

¹³Calu won nyithindho bedo ku cwinye ma ng’ic kum nyithindhe, E Yehova de bedo ku cwinye ma ng’ic kumeno kum ju m’ulwore.

¹⁴Kum eng’eyo kumwa; Bpoi ya wan utur.

¹⁵Nindo mi dhanu calu lum; Calu thiuboko m’i thim, evugni kumeno.

¹⁶Kum yamu kadhu kud i wie, e embe; Man kakare bing’eye kendo ngo.

¹⁷Ento mer mi bero pa Yehova gambre rondo ku rondo cil rondo ku rondo kum ju m’ulwore, Man bedopwe pare kum nyithindho mi nyithindho;

¹⁸Ni wadi ju m’ulworo lembariba pare, Man ni ju m’upoi kum cik pare kara gitimgi.

¹⁹Yehova ketho komker pare cungo i polo; Man ker pare bimo wi gin ceke.

²⁰Wumi mugisa ni Yehova, wu malaika pare, Wun ma wu tek i tego, ma wutimo lembe pare kakare, Ma wubewinjo badwal mi lembe pare.

²¹Wumi mugisa ni Yehova, wun udul pare ceke, Wu jutim pare, ma wutimo yeny ma ie yenyo.

²²Wumi mugisa ni Yehova, wu bodho pare ceke. I ka ceke mi bim pare: Mi mugisa ni Yehova, E ng’eyong’ec para.