Read Alur Zaburi 105 Bible Online

Zaburi 105 - Alur bible

Zaburi 105

¹A wufoi Yehova, wulwong’ nyinge; Wuketh giratima pare ng’eire i kind kodhidhanu.

²Wuwer ire, wuwer pak ire; Wuwec pi tic pare ceke ma wang’u ijo.

³Wuyungru giwu ni kum nyinge ma leng’: Wek anyong’a neg adunde ju m’uyenyo Yehova.

⁴Wuyeny Yehova ku tego pare; Wuyeny wang’e thiri thiri;

⁵Wupoi kum tic pare ma wang’u ijo m’etimo, Musana pare, ku lembapoka mi dhoge,

⁶E wu kodhi Ibrahim ma jatic pare, Wu nyithindho pa Yakobo, ma pare, ma jufoyo.

⁷En e Yehova Mungu mwa: Lembapoka pare ni i ng’om ngung’.

⁸Epoi kum lembariba pare mi nja, Lembe m’eng’olo ni dhanum’utuk rubanga,

⁹Lembariba m’etimo kud Ibrahim, Man kwong’ pare ni Isak,

¹⁰Man edwoko lembene tek ni Yakobo ni cik, Ni Israel ni lembariba mi nja,

¹¹Ewacu kumae, Abimio ng’om Kanan iri, Gagi mir aba mu;

¹²Kinde ma gi dhanu ma nyanok ku wel, Eyo, gi nok hai, man umondo i ie.

¹³Man giwotho ku ba thek ku ba thek, Ku ba ker acel utundo ba dhanu mange.

¹⁴Eyio ngo ng’atu moko timgi rac; Eyo, ejuko ju m’ubimo ni kumgi,

¹⁵Ewacu kumae, Kud wumul kum jupara m’awiro, Man kud wutim rac kum jubila para.

¹⁶Man elwong’o ndra wi ng’om; Eturo jamjeng’ ceke mi kwen.

¹⁷Eoro ng’atu acel i wang’gi; Yusuf jung’iewo ni jatic:

¹⁸Gitimo tiende rac ku nyoro: Jukethe i nyoro mi nyunyu,

¹⁹Cil i nindo ma lembe pare timbre i ie kakare, Lembe pa Yehova ponje.

²⁰Ubimo oro kwenda man egonye; En e jabim mi kodhidhanu, man eweke.

²¹Ekethe ni rwoth mi ot pare, Man jabim mi tim pare ceke;

²²Kara etwi judongomawijo pare calu eyenyo, Man eponj judongo pare ku rieko.

²³Israel bende mondo i Misiri; Man Yakobo bedo ni umondo i ng’om pa Ham.

²⁴Man enyayu dhanu pare dit, Man edwokogi tek ma sagu jusend migi.

²⁵Eloko adundegi kara gidag dhanu pare, Kara gitim jutic pare kud abombi.

²⁶Eoro Musa ma jatic pare, Man Harun m’egoyo wie.

²⁷Giketho giranyutha pare i kindgi, Ku musana i ng’om pa Ham.

²⁸Eoro mudho, man edwoke col; Man gijai kum lembe pare ngo.

²⁹Eloko pi migi ni rimo, Man enego rec migi.

³⁰Ng’om migi pong’ kud ungwal I kusika mir ubimo migi.

³¹Eyero, man udul ulwang’ni wok, Man nyogo i kieu migi ceke.

³²Emio igi pei ka koth, Man mac m’uliel i ng’om migi.

³³Egoyo ulok migi bende man yendubolo, Man eturo yedhi mi kieu migi.

³⁴Eyero; man bonyo bino, Man usene, ma kwandre ngo,

³⁵Man gicamu uboko ceke mi ng’om migi kubang’e kubang’e, Man gicamu cam m’ucek i ng’om migi.

³⁶Egoyo kayu ceke m’i ng’om migi bende, En e landu mi tego migi ceke.

³⁷Man ewodhogi woko ku mola ma tar man mola ma kwar; Man ng’atu ma ng’ic acel de mbe i kind suru pare.

³⁸Anyong’a nego Misiri kinde ma giai; Kum lworo migi podho i wigi.

³⁹Epedho afuru ni jambum, Man mac kara umi der ku diewor.

⁴⁰Gipenjo, man ekelo aywer, Man eyeng’ogi ku kwen m’i polo.

⁴¹Eyabu cana, man pi thwogre; Gimol i ka m’uthwo calu kulo ma dit.

⁴²Kum epoi kum lembe pare ma leng’, Man kum Ibrahim ma jatic pare.

⁴³Man ewodho dhanu pare woko ku mutoro, Man jupare m’egoyo wigi ku wer.

⁴⁴Emio igi ng’om mi thek; Man gimwonyo tic ma kodhidhanu muli ko ni aba:

⁴⁵Kara giwor lembang’ola pare, Man gimok kum cik pare. Wupak Yehova.