Read Alur Zaburi 106 Bible Online

Zaburi 106 - Alur bible

Zaburi 106

¹Wupak Yehova. A wufoi Yehova; kum en e ber; Kum mer mi bero pare bedo mi nja.

²Ng’a ma copo yero pi tic ma tek pa Yehova, Kadi m’unyuth pak pare ceke?

³Ju m’uworo lembapoka gi jumugisa, Man ng’atu ma timo bedopwe ku ba nindo ceke.

⁴Poi pira, E Yehova, calku bero m’itimo ni dhanu peri; A liewa ku both peri,

⁵Kara anen mierolembe mi dhanu peri m’igoyo wigi, Kara anyong’a nega ni kum mutoro mi thek peri, Kara mutoro nega karacelo kud aba peri.

⁶Wadubo waku kwaruwagi, Watimo kier, wadubo.

⁷Kwaruwa ng’eyo thelembe mi musana peri ngo i Misiri; Gipoi ngo kum udul mer mi bero peri, Ento gijai dhu nam, en e Nam Makwar.

⁸Ento ebodhogi pi nyinge, Kara eketh tego pare ma tek ung’eire.

⁹Ejuko Nam Makwar bende, man edwono: Ketho etelo wigi kud i nam, calu kud i langa.

¹⁰Man ebodhogi ni cing’ ng’atu m’udagugi, Man ewarugi ni cing’ jadegi.

¹¹Man pi umo jusendgi; Acel de mbe i kindgi m’udong’

¹²Gilund giyio lembe pare; Giwero pak pare.

¹³Wigi wil pio kum tic pare; Gikuro lembapora pare ngo,

¹⁴Ento giketho cwinygi hai kum piny i langa, Man gibidho Mungu i ng’om ngele.

¹⁵Man emio igi gin ma gikwayu, Ento eketho ng’eyong’ec migi mok.

¹⁶Kumira negogi bende kum Musa i kagonjo, Man Harun ma ng’atu ma leng’ pa Yehova.

¹⁷Ng’om uyabre man emwonyo Dathan, Man eumo udul mir Abiram.

¹⁸Man jucwinyo mac i kind udulgi; Lebmac uwang’u dhanu ma judubo;

¹⁹Gitimo nyathi dhiang’ i Horeb, Man girwo ni ayi gin m’acwia m’athiedha.

²⁰Giloko dwong’ migi kumeno Pir ayi koni dhiang’ ma camu lum.

²¹Wigi wil kum Mungu ma Jalar migi, M’utimo gin ma dwong’ i Misiri,

²²Tic mi musana i ng’om pa Ham, Man gin ma ng’oyo ndiri ba Nam Makwar,

²³Ka kumeno ewacu nia ebinyothogi, Tek Musa m’egoyo wie kucungo i wang’e i ka m’umor ungo, Kara elok kwinyo pare cen, kara kud enyothgi.

²⁴Eyo, gicayu ng’om mi mutoro, Giyio lembe pare ngo,

²⁵Ento ging’ur i hema migi, Man gi winjo dwand Yehova ngo.

²⁶Ka kumeno eting’o cinge i kumgi, Ya enyothgi i langa,

²⁷Man nia ebinyotho kodhigi i kind thek, Man ekethgi i ng’om.

²⁸Giribri gigi bende kum Bal-peor, Man gicamu lam mi ju m’utho.

²⁹Kumeno ginyayu ng’ecwiny i ie ku giratima migi; Man thong’om upodho i wigi.

³⁰Finehas ulund ucungo malu, man etimo lembapoka; E kumeno thong’om ujik.

³¹Man jukwanu maeni ire ni bedopwe, Cil kum dhanum’utuk ceke mi nja.

³²Ginyayu ng’ecwiny i ie bende ba pi mi Meriba, Kum kumeno lembe timbre rac kum Musa pigi;

³³Kum gijai ni tipone, Man eyero lembe ma maku kud eyer ku dendhoge.

³⁴Ginyotho kodhidhanu ngo, Calu Yehova ng’olo igi,

³⁵Ento giribri gigi ku thek, Man giponjo ng’eyo tic migi,

³⁶Man gitimo ni mungu m’araga migi, M’udoko ni uwic igi.

³⁷Eyo, gilamu wotgi ku nyiggi ni pajogi,

³⁸Man gicwiro rimo ma lembe mbe, En e rimb wotgi ku nyiggi, Ma gilamu nimungu m’araga mi Kanan; Man ng’om unyothre ku rimo.

³⁹Kumeno gicido ku tic migi, Man gitimo tarwang’ i giratima migi.

⁴⁰Ka kumeno kwinyo pa Yehova opo kum dhanu pare, Man edagu aba pare.

⁴¹Man emiogi i cing’ thek; Man ju m’udagugi gibimo wigi.

⁴²Judegi migi bende gisendogi, Man jujwigogi the cing’gi.

⁴³Ebodhogi wang’ udul; Ento gijai i lembapora migi, Man jujwigogi i kier migi.

⁴⁴Ento eneno lem ma tek migi, Kinde m’ewinjo ywak migi.

⁴⁵Man epoi kum lembariba pare pigi, Man elokre calkud udul mer mi bero pare.

⁴⁶Eketho ngisi nego dhanu ceke bende M’uterogi ni ng’eca i kumgi.

⁴⁷Bodhwa, E Yehova Mungu mwa, Man icokwa kud i kind thek, Kara wafoi nyingi ma leng’, Man kara wasag kum pak peri.

⁴⁸Mugisa bed ni Yehova, Mungu mir Israel, Ugambre con cil nja. Man wek dhanu ceke wac kumae, Amen. Wupak Yehova.