Read Alur Zaburi 107 Bible Online

Zaburi 107 - Alur bible

Zaburi 107

¹A wufoi Yehova; kum en e ber; Kum mer mi bero pare bedo mi nja.

²Wek ju ma juwaru pa Yehova giwac kumeno, M’ewaru kud i cing’ jasend,

³Man m’ecoko kud i ng’om, Ku yo nyangu man ku yo reto, Ku yor ariwa ma malu man ku yor ariwa ma piny.

⁴Giwotho i langa i yoj ng’om ngele; Ginwang’u adhura moko ngo mi bedo.

⁵Ma kec ku rieu de negogi, Ng’eyong’ec migi voc yor i igi.

⁶Gilund giywak ba Yehova i can migi, Man ebodhogi kud i lem ma tek migi,

⁷Etelo wigi bende ku yo m’atira, Kara gici bang’ adhura mi bedo.

⁸A tek dhanu gipaku Yehova kum mer mi bero pare, Man kum tic pare ma wang’u ijo mi nyithindho mi dhanu mire!

⁹Kum eyeng’o ng’eyong’ec kud ava gin m’unege, Man epong’o ng’eyong’ec ma kec ubenege ku gin ma ber.

¹⁰Wadi ju m’ubedo i mudho man i tipo piny mi tho, Ma gibedo atwia ku masendi man nyunyu.

¹¹Kum gijai kum lembe pa Mungu, Man gicayu lembapora pa Ng’atu ma Malu Ngbir:

¹²Ka kumeno ejwigo adundegi ku tic mi muli; Gipodho piny, man ng’atu moko mbe m’ukonygi,

¹³Gilund giywak ni Yehova i can migi, Man ebodhogi kud i lem ma tek migi.

¹⁴Ewodhogi kud i mudho ku tipopiny mi tho, Man erwadu twic migi bwa.

¹⁵A tek dhanu gipaku Yehova kum mer mi bero pare, Man kum tic pare ma wang’u ijo ni nyithindho mi dhanu!

¹⁶Kum eturo dhugang’ mi mola, Man ethumo utwindi mi nyunyu bwa.

¹⁷Jusendo jukusegu kum kier migi, Man kum dubo migi,

¹⁸Ng’eyong’ec migi dagu cemo ceke ma kwonde tung’ tung’; Man gicoro ceng’ni dhugang’ mi tho.

¹⁹Gilund giywak ni Yehova i can migi, Man ebodhogi kud i lem ma tek migi.

²⁰Eoro lembe pare, man ecangugi, Man ebodhogi kud i nyoth migi.

²¹A tek dhanu gipaku Yehova kum mer mi bero pare, Man kum tic pare ma wang’u ijo ni nyithindho mi dhanu!

²²Man wek githier lam mi foyofoc, Man giyer pi tic pare ku wer.

²³Ju m’uloro piny dhu nam ku combo, Ma timo tic i pi ma dit;

²⁴Maeni gineno tic pa Yehova, Ku musana pare i nam ma thuth,

²⁵Kum eng’olo, man eting’o yamu mi wavuvu, Ma ting’o mukurane.

²⁶E giidho malu i polo, giloro piny kendo i ka ma thuth: Ng’eyong’ec migi loi kum can.

²⁷Wigi wirogi ku ku ku, man gikier calu ng’atu m’uraer ku kong’o, Man cwinygi ng’abre.

²⁸Gilund giywak ba Yehova i can migi, Man ewodhogi woko kud i lem ma tek migi.

²⁹Ekwio wavuvu ti, Ketho mukurane ginindo.

³⁰Anyong’a lund unegogi kum giling’; Kum kumeno eterogi dhu wath ma giyenyo.

³¹A tek dhanu gipaku Yehova kum mer mi bero pare, Man kum tic pare ma wang’u ijo ni nyithindho mi dhanu!

³²Wek giyunge bende i cokri mi dhanu, Man gipake i dilo mi judongo.

³³Edwoko kulo ma dit ni langa, Man kulo mi pi ni ng’om rieu;

³⁴Ng’om ma cego nyinge ni ng’om ngele mi kadu, Kum dubo mi dhanu m’ubedo i ie.

³⁵Edwoko langa ni kut mi pi, Man ng’om ngele ni kulo mi pi.

³⁶Man eketho ju ma kec unegogi gibedo keca, Kara giyik adhura mi bedo.

³⁷Man gicoi podho, gipidh podho mir ulok de, Man gigam igi nying’ mi nyai.

³⁸Emio igi mugisa bende, ketho ginyai dit; Man eyio ngo nia lim migi dok nok.

³⁹Kendo, gijwik man gigung’ piny Ni kum masendi, ku ruvwa, man can.

⁴⁰Ekonjo cac wi judongomawijo, Man erwinyogi i yamba, ka ma yo mbe i ie.

⁴¹Ento eting’o jucanpiny malu ni ma sendi, Man etimo ire juode calu udul.

⁴²Ju m’atira binene, man anyong’a binegogi; Man kier ceke bimio dhoge.

⁴³Ng’atu ma tek e riek ebiparu pi gin maeni; Man igi bipido pi mer mi bero pa Yehova.