Read Alur Zaburi 109 Bible Online

Zaburi 109 - Alur bible

Zaburi 109

¹Kud iling’, E Mungu mi pak para;

²Kum dhu jadubo ku dhu abombi giyabri i kuma: Giyero i kuma ku leb mi ndra.

³Gitieka bende ku lembe mir adegi, Man gikiedo i kuma ma lembe mbe.

⁴Adegi en e giracula mi mer para; Ento amira gira ni rwo.

⁵Man gimio ira lem ma rac ni sukulia mi lem ma ber, Man adegi pi mer para.

⁶Keth dhanu ma jadubo i wie; Man wek jasend ucung i cinge ma yor acwic.

⁷Kinde ma jupoko lembe pare, wek ewok woko ku lembe i wie; Man wek rwo pare lokre ni dubo.

⁸Wek ceng’ pare bed nok; Man wek ng’atu mange mak ka tic pare.

⁹Wek nyithindho pare bed ma weggi mbe, Man dhaku pare dhaku ma cware tho.

¹⁰Wek nyithindhe bed rwa man jukwai cemo; Man wek giyeny cemo migi ku i kakagi ma lic.

¹¹Wek javugdhanu mak gin ceke m’ebedo ko; Man wek juwirok giyak tic pare mi muli.

¹²Wek ng’atu moko kud ubed nuti m’unyuth bero ire; Wek jungisi bed umbe ni nyithindho pare ma kic.

¹³Wek jukab nyikwaye woko; Wek nyinge kabre woko i kind dhanum’utuk ma cen.

¹⁴Wek Yehova poi kum kier pa kwaru mire; Man kud iwek dubo pa min urucre woko.

¹⁵Wek gibed i wang’ Yehova thiri thiri, Kara ekab poi ma pigi woko kud i ng’om;

¹⁶Kum epoi ungo kum nyutho bero, Ento esendo jacan ku jacanpiny, Man ju m’adundegi tur, kara eneggi,

¹⁷Eyo, emaru kwong’, man ebino i bang’e; Man anyong’a nege ngo kum mugisa, man ebedo bor kude.

¹⁸Eronjre gire bende ku kwong’ calku kendi pare, Man emondo yor i ie calu pi, Man calu mo i cogo pare.

¹⁹Wek ebed ire calu kendi m’eumbre ko gire, Man pi thondhpier m’etwire ko thiri thiri.

²⁰Maeni sukulia m’uai ba Yehova ni ju send para, Man ni ju ma weco lem ma rac kum ng’eyong’ec para.

²¹Ento tim kuda ni kum nyingi, E Yehova ma Rwoth: Kum mer mi bero peri e ber, bodha;

²²Kum an a jacan man jacanpiny, Man rem ni i adundena yor i ia.

²³Acidho calu tipopiny kinde m’eloro: Juthora malu ku piny calu bonyo.

²⁴Conga ng’ic kum kwiro cam; Man ring’kuma mok.

²⁵Adoko calu cac bende igi: Kinde ma ginena, giyengo wigi.

²⁶Konya, E Yehova Munguna; A bodha calku mer mi bero peri:

²⁷Kara ging’ei nia maeni cingi; Nia itimo maeni in, Yehova.

²⁸Wek gikwong’, ento imi mugisa: Kinde ma giai, lewic bimakugi, Ento anyong’a binego jatic peri.

²⁹Wek jusend para gironjri ku lewic, Man wek giumbri gigi ku lewic migi calku kanzu.

³⁰Abifoyo Yehova dit ku dhoga; Eyo, abipake kind udul.

³¹Kum ebicungo i cing’ ma yor acwic pa jacanpiny. Kara ebodhe ni ju m’upoko lembe kum ng’eyong’ec pare.