Read Alur Zaburi 112 Bible Online

Zaburi 112 - Alur bible

Zaburi 112

¹Wufoi Yehova. Mugisa ni ng’atu m’ulworo Yehova, Ma anyong’a nege dit kum lembang’ola pare.

²Kodhi pare bibedo tek i ng’om: Mugisa bikwanyu kodhi ju m’atira.

³Piny ku lonyo ni i ot pare; Man bedopwe pare bedo mi nja.

⁴Der wok i mudho ni ju m’atira: En e won bero, man won kisa, man e pwe.

⁵Ebedo ber ni ng’atu ma timo ku bero man ma mio banja; Ebiketho lembe pare cungo i pokolembe.

⁶Kum cwinye biringo ki ngo; Jubipoi mi nja kum ju ma pwe.

⁷Lworo binege ngo kum rwonglembe ma rac: Adundene cungo, m’egeno ko Yehova.

⁸Adundene cungo tek, lworo binege ngo, Cil m’eneno ko lembe ma ie yenyo kum jusend pare.

⁹Elalu, emio ni jucanpiny; Bedopwe pare bedo mi nja: Jubidodo tunge ku yung.

¹⁰Jadubo binene, man can binege; Ebikayu lake, man ebing’oi: Yeny ma jadubo yenyo binyothre.