Read Alur Zaburi 116 Bible Online

Zaburi 116 - Alur bible

Zaburi 116

¹Amaru Yehova, kum ewinjo Dwanda ku kwac para.

²Kum eleng’o ithe i bang’a, Ka kumeno abilwong’e cil ma fodi abedo kwo.

³Thol mi tho tieka, Man remo mi liel wok i kuma: Anwang’u ruvwa ku can.

⁴Alund alwong’o nying’ Yehova: E Yehova, akwei, bodh ng’eyong’ec para.

⁵Yehova en e won bero, man pwe; Eyo, Mungu mwa e won kisa

⁶Yehova gwoko ju ma riek ungo: Jujwiga, man ebodha.

⁷Dwog ba yom peri, E ng’eyong’ec para; Kum Yehova timo ku laccinge i kumi.

⁸Kum ibodho ng’eyong’ec para ni tho, Wang’a de ni piwang’, Tienda de ni podho.

⁹Abiwotho i wang’ Yehova I ng’om mi ju ma kwo.

¹⁰Ayio, kum abiweco: Jusenda dit:

¹¹Awacu i vur vur para kumae, Dhanu ceke gi jundra.

¹²Abiculo ang’o ni Yehova Kum kony pare ceke ma yor i bang’a?

¹³Abigamu kikombe mi both, Man abilwong’o nying’ Yehova.

¹⁴Abitimo lembang’ola para ni Yehova, Eyo, i vut dhanu pare ceke.

¹⁵Tho mi jumaleng’ pare Pire tek i wang’ Yehova.

¹⁶E Yehova, an a jatic peri mandha; An a jatic peri, wod bong’ peri; Igonyo twic para.

¹⁷Abithiero iri lam mi foyofoc, Man abilwong’o nying’ Yehova.

¹⁸Abitimo lembang’ola para ni Yehova, Eyo, i vut dhanu pare ceke,

¹⁹I lelagang’ pa Yehova, I die ii, E Yerusalem. Wupak Yehova.