Read Alur Zaburi 119 Bible Online

Zaburi 119 - Alur bible

Zaburi 119

¹[2] Mugisa ni ju m’ubedo atira i yo, Ma giwotho ku cik pa Yehova.

²Mugisa ni ju m’uworo lembatuca pare, Ma giyenye kud adunde ceke,

³Eyo, gitimo gondri moko ngo; Giwotho i yo pare.

⁴Ing’olo iwa ponji peri, Kara waketh cwinywa i kumgi.

⁵A tek yo para cungo Kara aketh cwinya kum lembang’ola peri!

⁶Jubilund ketho lewic i wia ngo, Kinde m’aparu pi lembang’ola peri ceke.

⁷Abifoi kud adunde m’atira, Kinde m’amaku ng’eyo lembapoka peri ma pwe.

⁸Abiketho cwinya kum cik peri: A kud ikuna ma gwei.

⁹Jalawobi bilwoko yo pare nenedi? Ni kum gwokri calku lembe peri.

¹⁰Ayenyi kud adundena ceke: A kud iyi akier ku lembang’ola peri.

¹¹Akanu lembe peri i adundena, Kara kud adub iri.

¹²In i jamugisa, E Yehova: Ponja ku cik peri.

¹³Ayero lembapoka ceke m’i dhogi Ku dendhoga.

¹⁴Anyong’a nega i yo mi lembatuca peri, Calu kum lonyo ceke.

¹⁵Ia bipido pi ponji peri, Man abiparu pi yo peri.

¹⁶Mutoro binega gira kum cik peri: Wia biwil ungo kum lembe peri.

¹⁷Tim ku laccing’ kum jatic peri, kara abed kwo; Kum kumeno abiketho cwinya kum lembe peri.

¹⁸Yab wang’a, kara anen Gin ma wang’u ijo kud i cik peri.

¹⁹An a umondo i ng’om: Kud ipan lembang’ola peri ira.

²⁰Ng’eyong’ec para tur ni kum ava M’ebedo ko kum lembapoka peri i nindo ceke.

²¹Ijuko jukuhaya ma jukwong’o, M’ukier ni lembang’ola peri.

²²Kab cac kud acidi woko kud i bang’a; Kum aworo lembatuca peri.

²³Judongomawijo bende gibedo man gi weco pira; Ento jatic peri pido pi cik peri.

²⁴Lembatuca peri gi mutoro para Man jupor lembe para.

²⁵Ng’eyong’ec para moko kum utur: Yep cwinya calku lembe peri.

²⁶Ayero pi yo para, man iloko ira lembe: Ponja ku cik peri.

²⁷Keth ang’ei yo mi ponji peri: Kum kumeno ia bipido pi tic peri ma wang’u ijo.

²⁸Ng’eyong’ec para podho kum ter: Mi ira tego calku lembe peri.

²⁹Kab yo mi ndra kud i bang’a; Man imi ira cik peri ku bero.

³⁰Afoyo yo mi bedo mandha: Aketho lembapoka peri i wang’a.

³¹Amoko kum lembatuca peri: E Yehova, kud iketh lewic i wia.

³²Abiringo i yo mi lembang’ola peri, Kinde m’ibidwoko adundena lac.

³³E Yehova, ponja ku yo mi cik peri; Man abiwore cil i kajikne.

³⁴Mi ira ng’eyothelembe, man abiworo cik peri; Eyo, abiketho cwinya i kume kud adundena ceke.

³⁵Keth awoth i yo mi lembang’ola peri; Kum anyong’a nega i kume.

³⁶Lok adundena ba lembatuca peri, Man kum ketho cwiny hai kum piny ungo.

³⁷Lok wang’a cen kum neno lem ma kite mbe, Man yep cwinya i yo peri.

³⁸Keth lembe peri bed tek ni jatic peri. Ma en e mi lworo peri.

³⁹Lok cac m’alworo cen; Kum lembapoka peri gi ber.

⁴⁰Nen, ava ponji peri nega: Yep cwinya i bedopwe peri.

⁴¹Wek mer mi bero peri bende bin i bang’a, E Yehova, En e both peri, calku lembe peri.

⁴²Kum kumeno abibedo ku lembaloka ni ng’atu m’ucaya; Kum ageno lembe peri.

⁴³Man kud ikab lembe mi lemandha pet kud i dhoga; Kum ageno lembapoka peri.

⁴⁴Kum kumeno abiketho cwinya kum cik peri thiri thiri Mi rondo ku rondo.

⁴⁵Man abiwotho agonya; Kum ayenyo ponji peri.

⁴⁶Abiweco pi lembatuca peri bende i wang’ ju m’ubimo, Man jubiketho lewic i wia ngo.

⁴⁷Man anyong’a binega gira kum lemba ng’ola peri, M’amaru.

⁴⁸Abiting’o cinga malu bende kum lembang’ola peri, m’amaru; Man ia bipido pi cik peri.

⁴⁹Poi kum lembe ni jatic peri, Kum iketho ageno.

⁵⁰Maeni juk para i masendi para; Kum lembe peri yepo cwinya.

⁵¹Jukuhaya gisasu lele i kuma dit: Ento aweko cik peri ngo.

⁵²Apoi kum lembapoka peri ma con, E Yehova, Man ajukra gira.

⁵³Kwinyo ma lieth umaka, Kum judubo m’uweko cik peri.

⁵⁴Cik peri bedo ni wer para I ot mi woth para,

⁵⁵Apoi kum nyingi ku diewor, E Yehova, Man aworo cik peri

⁵⁶Abedo ku maeni, Kum aworo ponji peri.

⁵⁷Yehova en e makapiny para: Awacu nia abiketho cwinya kum lembe peri.

⁵⁸Akwayu bero peri kud adundena ceke: Bed ku kisa i kuma calku lembe peri.

⁵⁹Ia pido kum yo para, Man aloko yo para ba lembatuca peri,

⁶⁰Atimo pio, man agalu ngo, Kara awor lembang’ola peri,

⁶¹Thol mi judubo udhoka; Ento wia wil kum cik peri ngo.

⁶²Abiai ku diewor ma ling’ kara afoi Kum lembapoka peri ma pwe.

⁶³An a juwadi dhanu ceke m’ulwori, Man mi ju ma woro ponji peri.

⁶⁴E Yehova, ng’om upong’ ku mer mi bero peri: Ponja ku cik peri.

⁶⁵Itimo dre kum jatic peri, E Yehova, calku lembe peri.

⁶⁶Ponja ku lembapoka ma ber man ng’eyong’ec; Kum ayio lembang’ola peri.

⁶⁷Ma fodi jukusenda ngo akier; Ento kawono aketho cwinya kum lembe peri.

⁶⁸In i ber, man itimo ber; Ponja ku cik peri.

⁶⁹Jukuhaya gicwio lemndra i kuma: Abiworo ponji peri kud adundena ceke.

⁷⁰Adundegi mio calu mo; Ento anyong’a nega kum cik peri.

⁷¹E ber ira kum jusenda; Kara amak ng’eyo cik peri.

⁷²Cik m’i dhogi e ber ira Sagu mola ma kwar ku mola ma tar rubanga.

⁷³Cingi tima man gidwoka tek: Mi ira ng’eyothelembe, kara amak ng’eyo lembang’ola peri.

⁷⁴Ju m’ulwori gibinena man anyong’a binegogi, Kum ageno lembe peri.

⁷⁵Ang’eyo nia lembapoka peri e pwe, E Yehova, Man nia isenda i bedo mandha.

⁷⁶Akwei, wek mer mi bero peri bed ni juk para, Calku lembe peri ni jatic peri.

⁷⁷Wek kisa peri ma ng’ic ubin i bang’a, kara abed kwo; Kum cik peri en e anyong’a para.

⁷⁸Wek lewic umak jukuhaya; kum giredha ku ndra: Ento ia bipido kum ponji peri.

⁷⁹Wek ju m’ulwori gilokri i bang’a; Man ju m’ung’eyo lembatuca peri.

⁸⁰Wek adundena bed cu kum cik peri, Kara lewic kud umaka.

⁸¹Ng’eyong’ec para voc pi both peri; Ento ageno lembe peri.

⁸²Wang’a tal pi lembe peri, Kinde m’awacu kumae, Ibijuka awene?

⁸³Kum adoko calu usau pigulok i yiro; Ento wia wil ungo kum cik peri.

⁸⁴Nindo pa jatic peri adi? Ibitimo lembapoka awene kum ju m’usenda?

⁸⁵Jukuhaya gitong’o vur ira, Ma gi calku cik peri ngo.

⁸⁶Lembang’ola peri ceke gi mandha: Gisenda ku ndra; konya.

⁸⁷Giyenyo jiga wi ng’om; Ento aweko ponji peri ngo.

⁸⁸Yep cwinya calku mer mi bero peri; Kum kumeno abiketho cwinya kum lembatuca mi dhogi.

⁸⁹Mi nja, E Yehova, Lembe peri guro i polo.

⁹⁰Bedo mandha peri bedo cil kum dhanum’utuk ceke: Iketho ng’om ucungo, man ebedo.

⁹¹Gibedo i ceng’ maeni calku lembapoka peri; Kum gin ceke gi jutic peri.

⁹²Tek cik peri bedo anyong’a para ngo, Kuno di arwinyo i masendi para.

⁹³Wia biwil ki ngo kum ponji peri; Kum iyepo cwinya kugi.

⁹⁴An a peri, bodha; Kum ayenyo ponji peri.

⁹⁵Judubo gikura, kara ginyotha; Ento ia bipido pi lembatuca peri.

⁹⁶Aneno kajik mi lembe ma cu ceke; Ento lembang’ola peri lac dit.

⁹⁷A amaru cik peri mire ma! En e lembapida para ceng’ du.

⁹⁸Lembang’ola peri dwoka riek ma sagu judegi para; Kum ginuti kuda thiri thiri.

⁹⁹Ng’eyothelembe para dit ma sagu mi juponji para ceke; Kum lembatuca peri gi lembapida para,

¹⁰⁰Ang’eyo lembe ma sagu ju m’uti, Kum aworo ponji peri.

¹⁰¹Acero tienda ni yo ma rac ceke ku bang’e kubang’e, Kara aketh cwinya kum lembe perh

¹⁰²Alokra cen ungo ni lembapoka peri; Kum iponja

¹⁰³Lembe peri mit i dhoga mire ma! Eyo, mit i dhoga ma sagu kic mire ma!

¹⁰⁴Anwang’u ng’eyothelembe ni kum ponji peri: Ka kumeno adagu yo mi ndra kubang’e kubang’e.

¹⁰⁵Lembe peri en e thala mi tienda, Man der ni yo para.

¹⁰⁶Akwong’o kwong’, man aketho ecungo, Kara aketh cwinya ku lembapoka peri ma pwe.

¹⁰⁷Jusenda dit: Yep cwinya calku lembe peri, E Yehova.

¹⁰⁸Akwei, E Yehova, jol girathiera mi dhoga ma ku berocwiny, Man iponja ku lembapoka peri.

¹⁰⁹Ng’eyong’ec para ni i cinga thiri thiri; Ento wia wii ungo kum cik peri.

¹¹⁰Judubo giketho uwic ira; Ento akier ungo kum ponji peri.

¹¹¹Agamu lembatuca peri ni aba mi nja; Kum gin anyong’a mir adundena.

¹¹²Aketho adundena kum timo cik peri Mi nja, cil kum kajikne.

¹¹³Adagu ju ma pidoigi ario; Ento amaru cik peri.

¹¹⁴In i kapondo para man ban para: Ageno lembe peri.

¹¹⁵Wuai kud i kuma, wu jutim rac, Kara awor lembang’ola pa Mungu para.

¹¹⁶Jenga calku lembe peri kara abed kwo; Kud iyi lewic umaka kum genogen para.

¹¹⁷Jenga, e abibedo museme, Man abiketho cwinya kum cik peri thiri thiri.

¹¹⁸Ijwigo dhanu ceke m’ukier kum cik peri; Kum abombi migi en e mananu.

¹¹⁹Icoro judubo mi ng’om ceke cen calu susu: Ka kumeno amaru lembatuca peri.

¹²⁰Ring’kuma miel kum lworoni; Man lworo nega kum lembapoka peri.

¹²¹Atimo lembapoka man bedopwe: Kud iweka ni jusend para.

¹²²Bed mukwatu ni jatic peri mi lembe ma ber: Kud iyi jukuhaya gisenda.

¹²³Wang’a tal kum both peri Man pi lembe peri ma pwe.

¹²⁴Tim ni jatic peri calku mer mi bero peri, Man iponja ku cik peri.

¹²⁵An a jatic peri; mi ira ng’eyothelembe, Kara ang’ei lembatuca peri.

¹²⁶Nindo tundo ni Yehova mi timo; Kum githiro cik peri.

¹²⁷Ka kumeno amaru lembapoka peri, Ma sagu mola ma kwar, eyo, ma sagu mola ma kwar ma leng’.

¹²⁸Ka kumeno aneno ponji peri ceke pi gin ceke en e a tha; Man adagu yo ceke mi ndra kubang’e kubang’e.

¹²⁹Lembatuca peri en e mi wang’uic; Ka kumeno ng’eyong’ec para worogi.

¹³⁰Yabu lembe peri mio der; Emio ng’eyothelembe ni ng’atu ma cobo.

¹³¹Ang’amu dhoga lac, man ayuyo; Kum ava lembang’ola peri nega.

¹³²Lokri i bang’a, man ibed ku kisa i kuma, Calu ibeditimo ni ju m’umaru nyingi.

¹³³Keth dakutielo para nyang’ i lembe peri; Man kud iyi kier moko bim wia.

¹³⁴Wara ni masendi mi dhanu: Kum kumeno abiketho cwinya kum ponji peri.

¹³⁵Keth weng’i rieny wi jatic peri; Man iponja ku cik peri.

¹³⁶Kulo mi pi mol kud i wang’a, Kum giketho cwinygi ngo kum cik peri.

¹³⁷In i pwe, E Yehova, Man lembapoka peri gin atira.

¹³⁸Ing’olo lembatuca peri ku bedopwe Man ku bedo mandhandha.

¹³⁹Ngiri para kaba woko, Kum jusend para wigi wil kum lembe peri.

¹⁴⁰Lembe peri leng’ hai; Ka kumeno jatic peri mare.

¹⁴¹An a nok man jumara ngo; Ento wia wil ungo kum ponji peri.

¹⁴²Bedopwe peri en e bedopwe mi nja: Man cik peri en e lemandha.

¹⁴³Can ku ndiba maka; Ento lembang’ola peri en e anyong’a para.

¹⁴⁴Lembatuca peri en e pwe mi nja: Mi ira ng’eyothelembe, man abibedo kwo.

¹⁴⁵Alwong’o kud adundena ceke; lok ira lembe, E Yehova: Abiworo cik peri.

¹⁴⁶Alwong’i; lara, Man abiketho cwinya kum lembatuc peri.

¹⁴⁷Atheko kugweno kinde ma piny uru, man aywak: Ageno lembe peri.

¹⁴⁸Wang’a lar ukuro kur mi diewor, Kara ia pid kum lembe peri.

¹⁴⁹Winj dwanda calku mer mi bero peri: Yep cwinya, E Yehova, calku lembapoka peri.

¹⁵⁰Ju m’ulubo tok dubo gicoro ceng’ni; Gibedo bor ku cik peri.

¹⁵¹In i ceng’ni, E Yehova; Man lembang’ola peri ceke en e andha.

¹⁵²Ang’eyo ni kum lembatuca peri con, Nia ikethe mi nja.

¹⁵³Par pi masendi para, man ibodha; Kum wia wil ungo kum cik peri,

¹⁵⁴Cung kum lembe para, man iwara: Yep cwinya calku lembe peri.

¹⁵⁵Both ni bor ku judubo; Kum giyenyo cik peri ngo.

¹⁵⁶Kisa peri ma ng’ic e dit, E Yehova: Yep cwinya calku lembapoka peri.

¹⁵⁷Ju m’utima tek man jusend para gi dupa; Ento aweko lembatuca peri ngo.

¹⁵⁸Aneno weg abombi, E can unega, Kum giketho cwinygi kum lembe peri ngo.

¹⁵⁹Nen maram amaru ko ponji peri: Yep cwinya, E Yehova, calu mer mi bero peri.

¹⁶⁰Udul lembe peri en e andha; Man lembapoka peri ma pwe kubang’e kubang’e bedo mi nja.

¹⁶¹Judongomawijo gisenda ma lembe mbe; Ento lworo nego adundena kum lembe peri.

¹⁶²Anyong’a nega kum lembe peri, Calu ng’atu m’unwang’u ayeki ma dit.

¹⁶³Amaru lemndra ngo man adage; Ento amaru cik peri.

¹⁶⁴Apeki wang’ abiro i ceng’ acel, Kum lembapoka peri ma pwe.

¹⁶⁵Ju m’umaru cik peri gibedo ku kwio cwiny ma dit; Man lembe moko mbe kugi mi kier.

¹⁶⁶Ageno both peri, E Yehova Man atimo lembang’ola peri

¹⁶⁷Ng’eyong’ec para woro lembatuca peri; Man amarugi apila.

¹⁶⁸Aketho cwinya kum ponji peri ku lembatuca peri; Kum yo para ceke ni i weng’i.

¹⁶⁹Wek ywak para bin ceng’ni i weng’i, E Yehova: Mi ira ng’eyothelembe calku lembe peri.

¹⁷⁰Wek kwac para tund i weng’i: Bodha calku lembe peri.

¹⁷¹Wek dendhoga yer pak; Kum iponja ku cik peri.

¹⁷²Wek leba wer pi lembe peri; Kum lembang’ola peri ceke en e bedopwe.

¹⁷³Wek cingi bed ayika mi konya; Kum afoyo ponji peri.

¹⁷⁴Ava both peri nega, E Yehova; Man cik peri en e anyong’a para.

¹⁷⁵Wek ng’eyong’ec para bed kwo, man ebipeki; Man wek lembapoka peri konya.

¹⁷⁶Akier calu rombo m’urwinyo; yeny jatic peri; Kum wia wil ungo kum lembang’ola peri.