Read Alur Zaburi 132 Bible Online

Zaburi 132 - Alur bible

Zaburi 132

¹Yehova, poi kum Daudi Kum masendi pare ceke:

²Maram ekwong’o ko ni Yehova, Man eng’olo lembe ni Ng’atu Matek pa Yakobo kumae:

³Andha abimondo i hema mi ot para ngo, Kadi idho wi kavuto para;

⁴Abimio nindo ni wang’a ngo, Kadi rip rip ni biendwang’a;

⁵Cil m’anwang’u ko kaka ni Yehova, Hema ni Ng’atu Matek pa Yakobo.

⁶Nen, wa winjo piri i Efratha: Wanwang’e i podho mi luli.

⁷Wabimondo i hema pare; Wabirwo ng’et kom mi tiende.

⁸E Yehova, ai imond i kayom peri; In, ku sanduk mi tego peri.

⁹Wek julam peri gironjri ku bedopwe; Man wek jumaleng’ peri kok ni mutoro.

¹⁰Ni kum jatic peri ma Daudi Kud ilok wang’ ng’atu m’iwiro peri cen.

¹¹Yehova kwong’o ni Daudi ku lemandha; Ebidok cen ungo kud i kume: Abiketho kodhi mi kumi wi komker peri.

¹²Tek nyithindho peri giworo lembariba para Ku lembatuca para m’abiponjo kogi, Nyithindho migi bende bijany wi komker peri mi nja.

¹³Kum Yehova goyo wi Sayuni; Eyenye ni kabedo pare,

¹⁴Maeni kayom para mi nja: Abibedo kakeni; kum ayenye.

¹⁵Abimio mugisa dit wi cemo pare: Abiyeng’o jucan pare ku kwen.

¹⁶Abironyo julam pare ku both; Man jumaleng’ pare bikok ma tek ku mutoro.

¹⁷Abiketho tung pa Daudi kudo kuca: Aketho thala ni ng’atu m’awira para.

¹⁸Abironyo judegi pare ku lewic; Ento jamkermiwic pare bimeu i wie gire.