Read Alur Zaburi 136 Bible Online

Zaburi 136 - Alur bible

Zaburi 136

¹A wufoi Yehova; kum e ber; Kum mer mi bero pare bedo mi nja.

²A wufoi Mungu mir udul mungu; Kum mer mi bero pare bedo mi nja.

³A wufoi Rwoth mi rwodhi; Kum mer mi bero pare bedo mi nja:

⁴Ire e kende m’etimo musana ma dit; Kum mer mi bero pare bedo mi nja:

⁵Ire m’etimo polo ni kum ng’eyothelembe; Kum mer mi bero pare bedo mi nja:

⁶Ire m’epedho ng’om wi pi; Kum mer mi bero pare bedo mi nja:

⁷Ire m’etimo der ma dit; Kum mer mi bero pare bedo mi nja:

⁸Ceng’ kara ubim dieceng’; Kum mer mi bero pare bedo mi nja;

⁹Dwi ku cero kara ubim ku diewor; Kum mer mi bero pare bedo mi nja:

¹⁰Ire m’egoyo Misiri kum kayu migi; Kum mer mi bero pare bedo mi nja;

¹¹Man ewodho Israel woko kud i kindgi; Kum mer mi bero pare bedo mi nja;

¹²Ku cing’ ma tek, man ku bot m’arieya; Kum mer mi bero pare bedo mi nja:

¹³Ire m’epoko Nam Makwar dra; Kum mer mi bero pare bedo mi nja.

¹⁴Man eketho Israel ukadhu kud i kinde; Kum mer mi bero pare bedo mi nja;

¹⁵Ento eredho Farao kud udul pare i Nam Makwar; Kum mer mi bero pare bedo mi nja:

¹⁶Ire m’etelo wi dhanu pare kud i langa; Kum mer mi bero pare bedo mi nja:

¹⁷Ire m’egoyo ju m’ubimo ma dongo; Kum mer mi bero pare bedo mi nja;

¹⁸Man enego ju m’ubimo ma pigi yik; Kum mer mi bero pare bedo mi nja:

¹⁹Sihon m’ubimo mi Juamori; Kum mer mi bero pare bedo mi nja;

²⁰Man Og m’ubimo mi Bacan; Kum mer mi bero pare bedo mi nja;

²¹Man emio ng’om migi ni aba; Kum mer mi bero pare bedo mi nja;

²²En e aba ni Israel ma jatic pare; Kum mer mi bero pare bedo mi nja:

²³M’epoi piwa i jwik mwa; Kum mer mi bero pare bedo mi nja;

²⁴Man m’ubodhowa ni jusend mwa; Kum mer mi bero pare bedo mi nja;

²⁵M’umio cemo ni weg kum ceke; Kum mer mi bero pare bedo mi nja.

²⁶A wufoi Mungu m’i polo; Kum mer mi bero pare bedo mi nja.