Read Alur Zaburi 140 Bible Online

Zaburi 140 - Alur bible

Zaburi 140

¹E Yehova, bodha ni ng’atu ma rac; Gwoka ni jarop:

²Ma pido lembe ma rac i adundegi; Gicokri gigi karacelo mir ali thiri thiri.

³Gipaku lebgi calu thwol; Kwir mir urobi ni the dendhoggi. [Sela.

⁴E Yehova, gwoka ni cing’ judubo; Gwoka ni jurop: Ma giyenyo gicor dakutielo para cen.

⁵Jukuhaya gikanu uwic, man thol ira; Githero voi dhu yo; Githero uwic ira. [Sela.

⁶Awacu ni Yehova kumae, In i Mungu para; Cik ithi ba dwal mi kwac para, E Yehova.

⁷E Yehova ma Rwoth, ma tego mi both para, Iumo wia i ceng’ mi lwiny.

⁸E Yehova, kud imi yeny ma dhanu ma judubo yenyo; Kud iketh lembapora pare ma rac ubed miero, gimaru dodri gigi. [Sela.

⁹Pi wi ju m’utieka, Wek ndre mi dendhoggi gigi umgi.

¹⁰Wek cukmac m’uwang’ upodh i wigi: Wek jubaigi i mac, I vur ma thuth, ma gibiai kud i ie ngo.

¹¹Jayerlembe ma rac bicungo ngo i ng’om: Lem ma rac bilubo tok jarop kara eng’iele.

¹²Ang’eyo nia Yehova bicungo kum lembe mi ju ma jusendogi, Man pokolembe mi jucanpiny.

¹³Andha ju ma pwe gifoyo nyingi; Ju m’atira bibedo i vuti.