Read Alur Zaburi 143 Bible Online

Zaburi 143 - Alur bible

Zaburi 143

¹Winj rwo para, E Yehova; leng’ ithi ba kwac para: Lok ira lembe i bedo mandha peri, man i bedopwe peri.

²Man kud imond i pokolembe ku jatic peri; Kum ng’atu moko mbe ma kwo ma pwe i weng’i.

³Kum jadegi sendo ng’eyong’ec para; Egoyo kwo para piny i ng’om: Eketho abedo i ka ma col, calu ju m’utho con.

⁴Ka kumeno cwinya voc yor i ia; Adundena bedo rwa yor i ia.

⁵Apoi kum ceng’ ma con; Ia pido kum giratima peri ceke; Ia pido kum tic m’i cingi.

⁶Athang’u cinga iri: Rieu nego ng’eyong’ec para i kumi, calu ng’om m’uthwo. [Sela.

⁷Tim pio ilok ko ira lembe, E Yehova; cwinya voc: Kud ipan weng’i ira, Amaru doko calu ju m’uloro piny i vur.

⁸Keth awinj mer mi bero peri kugweno; Kum ageno in: Keth ang’ei yo m’awoth i ie; Kum ating’o ng’eyong’ec para i beng’i.

⁹E Yehova, bodha ni judegi para: Aringo i beng’i nipondo.

¹⁰Ponja ku timo yeny ma ii yenyo; Kum in i Mungu para: Tipo peri e ber; Tela i ng’om m’atira.

¹¹Yep cwinya E Yehova, ni kum nyingi. Ni kum bedopwe peri wodh ng’eyong’ec para kud i can.

¹²Man ni kum mer mi bero peri kab judegina woko, Man inyoth dhanu ceke m’usendo ng’eyong’ec para; Kum an a jatic peri.