Read Alur Zaburi 144 Bible Online

Zaburi 144 - Alur bible

Zaburi 144

¹Mugisa bed ni Yehova ma cana para, M’uponjo cinga kud ali, Man lweta ku kiedo:

²Ma mer mi bero para, man ot ma tek para, Odkur para ma wiu, man jabodhna; Ban para, man ng’atu m’apondo i bang’e; M’ujwigo dhanu para the tienda.

³Yehova, dhanu en e ang’o, ma nia ing’eye? Kadi wod dhanu, ma nia iparu pire?

⁴Dhanu e calu yuyo: Nindo pare calu tipopiny ma kadhu.

⁵Gung’ polo peri, E Yehova, man ilor piny: Mul gudi, e gibiwodho yiro.

⁶Bol lukoth, man ikethgi; Or athero peri, man isendgi.

⁷Riei cingi ku malu; Bodha, man ilara kud i pi ma dit, Kud i cing’ juwirok;

⁸Ma dhoggi yero abombi, Man cing’gi ma yor acwic en e cing’ mi ndra.

⁹Abiwero wer ma nyen iri, E Mungu: Abiwero pak iri wi nanga ma thonde apar.

¹⁰In i ng’atu ma mio both ni ju m’ubimo; M’ubodho Daudi ma jatic peri ni palamularu ma rac.

¹¹Bodha, man ilara kud i cing’ juwirok, Ma dhoggi yero abombi, Ma cing’gi ma yor acwic de en e cing’ ma yor acwic mi ndra.

¹²Kinde ma wotwa bibedo calu yen m’udongo i aradu migi, Man nyigwa calu kidi mi gui ma jukaku calu tic mi ot p’ubimo;

¹³Kinde ma dero mwa pong’, ku cam ma kwonde tung’ tung’ ceke, Man rombe mwa nyol rubanga man rubanga apar dhu podho mwa;

¹⁴Kinde ma ter ni wi koni dhiang’ mwa; Kinde ma juturo ngo mi mondo man juwok woko de ngo, Man ywak de mbe i gengi mwa:

¹⁵Dhanu ma bedo kumeni gi jumutoro; Eyo, dhanu ma Mungu migi en e Yehova gi jumutoro.