Read Alur Zaburi 145 Bible Online

Zaburi 145 - Alur bible

Zaburi 145

¹Abipeki, Mungu para, E Ubimo; Man abimio mugisa ni nyingi nja ku nja.

²Ku ba rupiny ku ba rupiny abimio mugisa iri; Man abipaku nyingi nja ku nja.

³Yehova e dwong’, man maku jupake dit; Man dwong’ pare yenjre ngo.

⁴Dhanum’utuk bipaku tic peri ni dhanum’utuk wadi, Man gibiyero pi tic peri ma tek.

⁵Ia bipido pi bero mi dwong’ mi yung peri, Man pi tic peri ma wang’u ijo.

⁶Man dhanu biweco pi tego mi tic peri ma ng’oyo ndiri; Man abiyero pi dwong’ peri.

⁷Gibiweco pi poi mi bero peri ma dit, Man gibiwero pi bedopwe peri.

⁸Yehova e won bero, man won kisa; Ng’ecwiny nege pio ngo, man e dit ku mer mi bero.

⁹Yehova e ber ni dhanu ceke; Man kisa pare ma ng’ic ni wi tic pare ceke.

¹⁰Tic peri ceke bifoi, E Yehova; Man jumaleng’ peri gibimio mugisa iri.

¹¹Gibiyero pi dwong’ mi ker peri, Man gibiweco pi tego peri;

¹²Kara giketh wot dhanu ging’ei pi tic pare ma tek, Man lonyo mi dwong’ mi ker pare.

¹³Ker peri en e ker mi nja, Man bim peri bedo cil kum dhanum’utuk ceke.

¹⁴Yehova jengo dhanu ceke m’upodho Man eting’o dhanu ceke m’ugung’ piny.

¹⁵Wang’ gin ceke kuri; Man imio igi cemo migi i nindone.

¹⁶Iyabu cingi, Man iyeng’o gin ceke ma kwo kubang’gi.

¹⁷Yehova pwe i yo pare ceke, Man e won bero i tic pare ceke.

¹⁸Yehova ni ceng’ni dhanu ceke m’ulwong’e. Ni dhanu ceke m’ulwong’e i lemandha.

¹⁹Ebiketho yeny ma ju m’ulwore yenyo timbre kakare; Ebiwinjo ywak migi bende, man ebibodhogi.

²⁰Yehova gwoko dhanu ceke m’umare; Ento ebinyotho judubo ceke.

²¹Dhoga biyero pak pa Yehova; Man wek weg kum ceke gimi mugisa ni nyinge ma leng’ rondo ku rondo.