Read Alur Zaburi 18 Bible Online

Zaburi 18 - Alur bible

Zaburi 18

²Yehova en e cana para, man ot ma tek para, man jabodhna; Munguna, cana para, m’abipondo i bang’e; Ban para, man tung mi both para, man otkur para ma wiu.

³Abilwong’o Yehova, m’uromo ya jupake: Kum kumeno abiboth ni judegi para.

⁴Thol mi tho tieka, Man udul gin ma ayi Mungu mbe i kume nyayu lworo i ia.

⁵Thol mi liel utieka; Uwic mi tho wok i wia.

⁶I lem ma tek para alwong’o Yehova, Man aywak ba Mungu para: Ewinjo dwanda kud i hekalu pare, Man ywak para m’i wang’e mondo i ithe.

⁷Ng’om ulund uyengre man emiel; The gudi bende miel Man giyengri, kum kwinyo nege.

⁸Yiro idho malu kud i odiume, Man mac uwang’ kud i dhoge: Cukmac uopo kude.

⁹Eguro polo bende, man eloro piny; Man mudho ma bii ni the tiende.

¹⁰Man ewotho ku wi kerubi, man eringo; Eyo, eringo ku wi bomb yamu.

¹¹Eketho mudho ni kapondo pare, hema pare m’utieke gbur, Mudho mi pi, afuru ma yer yer mi polo.

¹²Afuru ma yer yer pare kadhu ni der mi wang’e, Pei ku cukmac.

¹³Yehova rundo bende kud i polo, Man Ng’atu ma Malu Ngbir uting’o dwande, Pei ku cukmac.

¹⁴Man ekilo athero pare, man elalugi; Eyo, eoro lukoth wang’ udul, man esendogi.

¹⁵Kakadhu mi pi lund unen, Man theng’om uyabre ngbeng’, Ni juk peri, E Yehova, Ni koto mi lietho mi odiumi,

¹⁶Eoro ku malu, egama, Ewodha kud i pi dupa.

¹⁷Ewodha ni jadegi para ma tek, Man ni ju m’udaga; kum gi tek ma saga.

¹⁸Gicori i wia i ceng’ mi ruvwa para; Ento Yehova bedo ni jamjeng’ para.

¹⁹Ewodha bende i ka ma lac; Ebodha, kum anyong’a nege i kuma.

²⁰Yehova mio sukulia ira calku bedopwe para; Eculo ira calku leng’ mi cinga.

²¹Kum agwoko yo pa Yehova, Man acamu co ngo ni Mungu para.

²²Kum lembapoka pare ceke ni i wang’a, Man acoro cik pare cen ungo kud i kuma.

²³Abedo cu bende i wang’e, Man agwokra gira ni kier para.

²⁴Ka kumeno Yehova culo ira calku bedopwe para, Calku leng’ cinga i wang’e.

²⁵Ibinyuthri ku kisa ni weg kisa; Ibinyuthri giri cu ni ng’atu ma cu;

²⁶Ibinyuthri giri leng’ ni ng’atu ma leng’; Man ibinyuthri ku co ni ng’atu ma jaco.

²⁷Kum ibibodho ju ma jusendogi; Ento wang’ mi kuhaya ibijwigo.

²⁸Kum ibiewinyo thala para: Yehova Mungu para bicaru mudho para.

²⁹Kum ang’enyo i udul ni kumi; Man apor ku wi gang’kidi ni kum Mungu para.

³⁰En e Mungu, yo pare cu: Lembe pa Yehova juponje; En e ban ni dhanu ceke m’upondo i bang’e.

³¹Kum ng’a ma Mungu, ma ku Yehova ngo Man ng’a ma cana, ma ku Mungu mwa ngo

³²Mungu m’utwia ku tego, Man m’udwoko yo para cu Ketho nia bota gigomo atum mi mola.

³³Edwoko tienda calu tiend nyajwaya: Man eketha malu wi kakara ma malu.

³⁴Eponjo cinga kud ali: Ketho nia bota gigona atum mi mola.

³⁵Imio ira ban mi both peri bende; Man cingi ma yor acwic uting’a malu, Man mol peri yunga.

³⁶Ikoko dhu dakutielo para the tienda, Man tienda kier ungo.

³⁷Abilubo tok judegi para, man abirubogi; Kadi abilokra cen de ngo ma fodi gikuthum Ungo.

³⁸Abitong’o lero i kumgi, kara ku giai kendo: Gibipodho the tienda.

³⁹Kum itwio piera ku tego mir ali: Ijwigo ju m’uai i kuma the tienda.

⁴⁰Iketho judegi para gilok ng’eigi ira, Kara akab ju m’udaga woko.

⁴¹Giywak, ento ng’atu moko mbe m’u bodho; Cil ba Yehova, ento eloko igi lembe ngo.

⁴²Alund aodogi nyung’u nyung’u pamir utur i wang’ yamu; Abayugi woko calu unzabu mi gengi.

⁴³Ibodha ni piem mi dhanu; Idwoke ni wi thek: Dhanu ma fodi ang’eyo ngo bitimo ira.

⁴⁴Kinde ma giwinjo pira gibiwora; Juwirok gibijwigri gigi ira.

⁴⁵Juwirok birwinyo woko, Man gibiwok woko kud i kakagi mi pondo ku kumgi m’umiel.

⁴⁶Yehova bedo kwo; man mugisa bed wi cana para; Man dwong’ ubed ni Mungu mi both para,

⁴⁷En e Mungu m’uculo kwor pira, Man m’ujwigo kodhidhanu the tienda.

⁴⁸Elara ni judegi para; Eyo, iting’a malu wi ju m’ujai ira; Ibodha ni ng’atu ma jarop.

⁴⁹Ka kumeno abifoi, e Yehova, i kind thek, Man abiwero pak ni nyingi.

⁵⁰Emio both ma dit ni ubimo pare, Man enyutho mer mi bero ni ng’atu m’ewiro pare, Ni Daudi ku nyikwaye, mi nja.