Read Alur Zaburi 19 Bible Online

Zaburi 19 - Alur bible

Zaburi 19

¹Polo yero pi dwong’ pa Mungu; Man apokapiny unyutho tic mi cinge.

²Dieceng’ ku dieceng’ wodho wec, Man diewor ku diewor nyutho ng’eyong’ec.

³Wec moko mbe kadi dhok; Dwandgi winjre ngo.

⁴Thondhgi cidho i ng’om ngung’, Man lembe migi cidho i tung’ ng’om. Eketho hema mi ceng’i igi,

⁵Ma en e calu cwar mugole m’ubewok woko kud i kusika pare, Man anyong’a nege calu ng’atu ma tek m’uringo i yo pare.

⁶Kawok pare gambre i tung’ polo, Man yo pare tundo kum gunde mucelo; Man gin moko mbe m’upondo ni liethone.

⁷Cik pa Yehova en e cu, m’edwoko ng’e yong’ec: Lembatuca pa Yehova en e andha m’edwoko ng’atu ma cobo riek.

⁸Cik pa Yehova atira, m’enyayu anyong’a i adunde: Lembang’ola pa Yehova e leng’ m’emio der ni wang’.

⁹Lworo pa Yehova e leng’, m’ebedo mi nja: Lembapoka pa Yehova en e andha, man gibedo ndhu pwe.

¹⁰Jufoyogi ma sagu mola ma kwar, eyo, ma sagu mola ma kwar dupa ma leng’j Gi lim lim ma sagu kic ku mio mi pedekic.

¹¹Mange ke jutwong’o kugi jatic peri: Sukulia ma dit nuti kum worogi.

¹²Ng’a ma copo ng’eyo kier pare? Dwoka leng’ ni gin m’ubedo amung’a.

¹³Cer jatic peri bende ni dubo mi kuhaya; Kud iyi gibed ku kero i wia: Abilund bedopwe, Man abibedo leng’ ni camuco ma dit.

¹⁴Wek lembe m’i dhoga ku pidoic mir adundena Ubed m’eyire i weng’i, E Yehova, cana para, man jawar para.