Read Alur Zaburi 22 Bible Online

Zaburi 22 - Alur bible

Zaburi 22

¹Munguna, Munguna, ikuna nedi? Nedi ibedo bor kum konya, man kum lembe mi cur para?

²E Munguna, aywak ku dieceng’, ento iloko ira lembe ngo; Man i nindo mi diewor, ento anwang’u yom ungo.

³Ento in i leng’, E in m’ibedo i kind pak mir Israel.

⁴Kwaruwa geni: Gigeno, man ibodhogi.

⁵Giywak i beng’i, man giboth: Gigeni, e juketho lewic i wigi ngo.

⁶Ento an a ukoko, man dhanu ngo; An a cac mi dhanu, man ma dhanu cayu.

⁷Dhanu ceke m’unena ging’iera ke ke: Ging’enjo dendhok, man giyengo wigi, giwacu kumae,

⁸Egeno Yehova, ya ebodhe: Wek ebodhe, kum mutoro nege i kume.

⁹Ento in i ng’atu m’uwodha kud i ic; Iketho ageno kinde m’ani kor ma.

¹⁰Jubaya i wii kud i ic; In i Mungu para ugambre ma ma nyola.

¹¹Kud ibed bor kuda; kum can ni ceng’ni; Kum ng’atu moko mbe m’ukonya.

¹²Thwoni dhiang’ dupa gitieka, Thwoni dhiang’ ma tek mi Bacan gitieka gbur.

¹³Giyabu dhoggi i kuma, Calu umvor m’ubeywak m’uberundo de.

¹⁴Jukonja calu pi, Cogo para ceke lokre ku i ujonje: Adundena calu udok; Eleny yor i ia.

¹⁵Tego para tal calu dekle: Leba moko kum Iwoknina: Man ikela i utur mi tho.

¹⁶Kum gwok gitieka: Udul jutim rac giguro i kuma; Giguro cinga ku tienda.

¹⁷Acopo kwanu cogo para ceke, Ginena man ginena tel;

¹⁸Gipoko kendi para i kindgi, Man gigoyo bongu para ku gagi.

¹⁹Ento kud ibed bor cen, E Yehova: E in i jakonyna, tim pio ikonya ko.

²⁰Bodh ng’eyong’ec para ni palamularu, Kwo para ma pire tek ni tego mi gwok.

²¹Bodha ku dhu umvor; Eyo, iloko ira lembe ku wi tung koni dhiang’ m’i thim.

²²Abiyero pi nyingi ni juwada; Abipeki i kind cokri.

²³Wu ju ma wulworo Yehova, wupake; Wu kodhi Yakobo ceke, wuyunge; Wu kodhi Israel ceke, bebe negwu i kume.

²⁴Kum ecayu kadi edagu masendi mi ju ma jusendogi ngo; Kadok wang’e de epanu ngo ire; Ento kinde m’eywak i bang’e, ewinjo.

²⁵Pak para ai i beng’i i cokri ma dit; Abiculo lembang’ola para i wang’ ju m’ulwore.

²⁶Ju ma mol gibicamu man gibiyeng’; Gibipaku Yehova gi ju ma giyenye: Wek adundeni bed kwo mi nja.

²⁷Tung’ ng’om ceke bipoi man gibilokri ba Yehova; Man wat ceke mi thek birwo i weng’i.

²⁸Kum ker en e pa Yehova; Man en e jabim wi thek.

²⁹Ju m’ucwe ceke m’i ng’om gibicamu man gibirwo: Ju m’uloro piny bang’ utur ceke gibirum i wang’e, En e ng’atu ma copo gwoko ng’eyong’ec pare ma kwo ngo.

³⁰Kodhidhanu bitimo ire; Jubikwane ni rwoth ni dhanum’utuk pare.

³¹Gibibino ma gibiyero pi bedopwe pare Ni dhanu ma jubinyolo, nia etime.