Read Alur Zaburi 25 Bible Online

Zaburi 25 - Alur bible

Zaburi 25

¹E Yehova, ating’o ng’eyong’ec para malu i beng’i.

²E Munguna, ageno in. Kud iyi lewic umaka; Kud iyi judegi para voya.

³Eyo, jumoko m’ukuri mbe ma jubiketho lewic umakgi: Lewic bimaku ju ma timo rop ma there mbe.

⁴Nyuth ira yo peri, E Yehova: Ponja ku yo peri.

⁵Tel wia i lemandha peri, man iponja; Kum in i Mungu mi both para; Akuri ceng’ du.

⁶E Yehova, poi kum ngisi peri ku mer mi bero peri; Kum gigamu bedo nuti con.

⁷Kud ipoi pi dubo mir aradu para, kadi camuco para; Poi pira calku mer mi bero peri, Kum bero peri, E Yehova.

⁸Yehova e ber man pwe: Ka kumeno ebiponjo judubo i yo.

⁹Ebitelo wi ju ma mol i pokolembe; Man ebiponjo ju ma mol ku yo pare.

¹⁰Yo pa Yehova ceke en e mer mi bero ku lemandha Ni wadi ju m’uworo lembariba pare ku lembatuca pare.

¹¹Ni kum nyingi, E Yehova, Wek kier para woko, kum en e dit.

¹²Ng’atu ma kani ma lworo Yehova? Ebiponje i yo m’ebifoyo.

¹³Ng’eyong’ec pare bibedo yo; Man ng’om bibedo ni aba ni nyikwaye.

¹⁴Lembapora pa Yehova ni ba ju m’ulwore; Man ebinyutho igi lembariba pare,

¹⁵Wang’a ni yo ba Yehova thiri thiri; Kum ebiwodho tienda kud i voi.

¹⁶Lokri i bang’a, man bed ku kisa i kuma: Kum wang’a bedo lic man jusenda.

¹⁷Can mir adundena doko dit: A wodha woko kud i can para.

¹⁸Pid pi masendi para man tagu para: Man iwek dubo para ceke woko.

¹⁹Pid pi judegi para, kum gi dupa; Man gidaga kud adegi mi rop.

²⁰A gwok ng’eyong’ec para, man ibodha: Kud iyi lewic umaka, kum apondo i beng’i.

²¹Wek bedocu ku bedopwe gigwoka, Kum akuri.

²²War Israel, E Mungu, Kud i can pare ceke.