Read Alur Zaburi 28 Bible Online

Zaburi 28 - Alur bible

Zaburi 28

¹E Yehova, abilwong’o i beng’i: Cana para, kud bed ira calu ng’atu ma winjo ngo; Kud ibed ling’ ira, Amaru doko calu ju m’uloro piny i vur.

²Winj dwal mi kwac para, kan aywak i beng’i, Kinde m’ating’o cinga yo ba kayerlembe peri ma leng’.

³Kud ipeya cen karacelo ku judubo, Man karacelo ku jutim kier; M’uweco ku kwiocwiny ku judhugola migi, Ento lembe ma rac ni i adundegi.

⁴Mi igi calu tic migi, man calku dubo mi giratima migi: Mi igi calku tic mi cing’gi; Cul igi calu m’uromo kugi.

⁵Kum giparu pi tic pa Yehova ngo, Kadi tic mi cinge, Ebiturogi piny man ebigomogi ngo.

⁶Mugisa bed ni Yehova, Kum ewinjo dwal mi kwac para.

⁷Yehova en e tego para man ban para; Adundena geno en, man anwang’u kony: Ka kumeno anyong’a nego adundena dit; Man abipake ku wer para.

⁸Yehova en e tego migi, Man en e ka ma tek mi both ni ng’atu ma juwiro pare.

⁹Bodh dhanu peri, man imi mugisa kum aba peri: Bed jakwac migi bende, man iting’gi malu rondo ku rondo.