Read Alur Zaburi 31 Bible Online

Zaburi 31 - Alur bible

Zaburi 31

¹Apondo i beng’i, E Yehova; Kud iwek junyai lewic i wia ki: Bodha ni kum bedopwe peri.

²Leng’ ithi piny i bang’a; bodha pio: Bed ira ni cana ma tek, Bed ni ot ma tek kara ubodha.

³Kum in i cana para ku ot ma tek para; Ka kumeno peya man itel wia ni kum nyingi.

⁴Wodha woko kud i voi ma giciko ling’ ira; Kum in i ka ma tek para.

⁵Aketho tipona i cingi: Iwara, E Yehova, in i Mungu mi lemandha.

⁶Adagu ju ma paru pi lem ma kite mbe mi ndra; Ento ageno Yehova.

⁷Anyong’a ku mutoro binega ku mer mi bero peri; Kum ineno masendi para; Ing’eyo ng’eyong’ec para i ruvwa;

⁸Man iciko bang’a ngo i cing’ judegi; Iketho tienda i ka ma lac.

⁹Tim ku kisa i kuma, E Yehova, kum ani i masendi: Wang’a mwony kum can, eyo, ng’eyong’ec para ku kuma de.

¹⁰Kum kwo para thum ku can, Man rundi para ku gamucwiny: Tego para rem kum kier para, Man cogona tal.

¹¹Adoko ni cac kum jusend para ceke, Eyo, dit hai ni judhugola para, Man lworo ni juwada; Ju ma ginena yo woko giringa.

¹²Wijo wil i kuma calu dhanu m’utho m’limbe i pidoic: An a calu agulu m’ung’eny.

¹³Kum awinjo pi yeronying’ mi dhanu dupa, Ndiri ng’oi kun ku kun: Kinde ma giporo lembe karacelo i kuma, Gipido ya gikab kwo para woko.

¹⁴Ento ageno in, E Yehova: Awacu kumae, In i Munguna.

¹⁵Nindo para ni i cingi: Bodha kud i cing’ judegina, man ni ju m’unyayu ragedo i kuma.

¹⁶Keth weng’i rieny wi jatic peri: Bodha ni kum mer mi bero peri.

¹⁷Kud iyi lewic upodh i wia, E Yehova; kum alwong’i: Wek lewic umak judubo, wek gibed ling’ i liel.

¹⁸Wek dendhok mi ndra ubed ajuba, Ma yero lem ma tek kum weg bedopwe, Ku kuhaya man cac.

¹⁹A bero peri dit mire ma, M’ikanu ni ju m’ulwori, M’itimo ni ju m’upondo i beng’i. I wang’ wot dhanu!

²⁰E ibipanugi i kapondo mi weng’i ni lembapora ma rac mi dhanu: Ibigwokogi ling’ i hema ni piem mi leb.

²¹Mugisa bed ni Yehova; Kum enyutho ira mer mi bero pare ma wang’u ijo i adhura ma tek.

²²An, awacu kr kr kumae, Jukaba woko kud i weng’i: Ento iwinjo dwal mi kwac para, Kinde m’aywak i beng’i.

²³A wumar Yehova, wu jumaleng’ pare ceke: Yehova gwoko ju mandha, Man eculo dit ni ng’atu ma timo ku kuhaya.

²⁴Wubed tek, man wek adundewu mak tegocwiny, Wun ceke ma wugeno Yehova.