Read Alur Zaburi 33 Bible Online

Zaburi 33 - Alur bible

Zaburi 33

¹Anyong’a negwu kum Yehova, E wu weg bedopwe: Pak umaku ju m’atira.

²Wufoi Yehova kud adungu: Wuwer pak ire ku nanga ma thondhe apar.

³Wuwer ire wer ma nyen; Wugoi cu ku badwal ma dit.

⁴Kum lembe pa Yehova en e atira; Man tic pare ceke jutimo i lemandha;

⁵Emaru bedopwe ku pokolembe: Ng’om upong’ ku mer mi bero pa Yehova.

⁶Jucwio polo ni kum lembe pa Yehova. Man udulgi ceke ni kum lietho mi dhoge.

⁷Ecoko pi mi nam karacelo calu ungu: Ekanu nam malu i odkan.

⁸Wek ng’om yu ulwor Yehova: Wek dhanu ceke m’ubedo i ng’om bebe neggi i kume.

⁹Kum eweco, man etimbre; Eng’olo, man ecungo ki.

¹⁰Yehova thiro lembapora mi thek; Eketho pidoic mi kodhidhanu doko mananu.

¹¹Lembapora pa Yehova cungo ki mi nja, Pidoic mir adundene ni dhanum’utuk ceke.

¹²Mugisa ni thek ma Mungu migi en e Yehova, Gi dhanu m’egoyo wigi ni aba pare ma dhe.

¹³Yehova neno kud i polo; Eneno wot dhanu ceke;

¹⁴Eneno kud i ka mi kabedo pare Wi dhanu ceke m’ubedo i ng’om,

¹⁵En m’eyiko adundegi ceke, M’epido pi tic migi ceke.

¹⁶Ubimo moko mbe ma both ni kum udul ma dit: Ng’atu ma tek both ungo ni kum tego ma dit.

¹⁷Riuni en e gin mananu mi both; Kadok abodha de ebodho ng’atu moko ngo ku tego pare ma dit.

¹⁸Nen, wang’ Yehova ni wi ju m’ulwore, Wi ju m’ugeno mer mi bero pare;

¹⁹Kara ebodh ng’eyong’ec migi kud i tho, Man egwokgi ma kwo i ndru.

²⁰Ng’eyong’ec mwa kuro Yehova: En e kony mwa man ban mwa.

²¹Kum anyong’a binego adundewa ni kume, Kum wageno nyinge ma leng’.

²²Wek mer mi bero peri, E Yehova, ubed i wiwa, Calu ma wageni ko.