Read Alur Zaburi 34 Bible Online

Zaburi 34 - Alur bible

Zaburi 34

¹Abimio mugisa ni Yehova ku ba nindo ceke: Pak pare bibedo i dhoga awe.

²Ng’eyong’ec para bilule ni kum Yehova Ju ma mol biwinjo pire, man anyong’a binego gi.

³A dong’ wayungu Yehova wakudu, Man dong’ wayungu nyinge karacelo.

⁴Ayenyo Yehova, man eloko ira lembe, Man elara kud i lworo para ceke.

⁵Gineno bang’e, e girieny; E lewic binego wang’gi ki ngo.

⁶Jacan maeni ywak, e Yehova winje, Elare de kud i can pare ceke.

⁷Malaika pa Yehova guro hema gbur kum ju m’ulwore, Man ebodhogi.

⁸A wubil wunen de ya Yehova e ber: Mugisa ni ng’atu m’upondo i bang’e.

⁹A wulwor Yehova, wu jumaleng’ pare; Kum can gin moko mbe ni ju m’ulwore.

¹⁰Nyithindh umvor giyeng’ ungo, man kec unegogi; Ento ju m’uyenyo Yehova re gin moko ma ber umbe ma cande binegogi.

¹¹Wubin, wu nyithindho, wuwinj dwanda: Abiponjowu ku lworo pa Yehova.

¹²Ng’atu ma kani m’uyenyo kwo, Man m’umaru nindo dupa, kara enen gin ma beri?

¹³Dong’ icer lebi kum gin ma rac, Dendhogi de kum yero lembabombi.

¹⁴Ai i lem ma rac, man itim ber; Yeny kwiocwiny, man iriem toke.

¹⁵Wang’ Yehova ni yo ba weg bedopwe, Ithe de bedo acika ni ywak migi.

¹⁶Wang’ Yehova ni kum ju m’utimo rac, Kara ekab poi ma pigi woko kud i ng’om.

¹⁷Weg bedopwe giywak, e Yehova winjo, Man elarugi kud i can migi ceke.

¹⁸Yehova ni ceng’ni ju ma adundegi tur, Man ebodho wagi ju ma cwinygi dieng’ kum dubo migi.

¹⁹Masendi pa won bedopwe gi dupa; Ento Yehova bodhe kud i ie ceke.

²⁰Egwoko cogo pare ceke: Acel de mbe i kindgi m’utur.

²¹Gin ma rac binego dhanu ma rac; Man ju m’udagu weg bedopwe jubigonjogi agonja.

²²Yehova waru ng’eyong’ec mi jutic pare; Man ng’atu moko mbe m’i kindgi m’upondo i bang’e ma jubigonjo.