Read Alur Zaburi 36 Bible Online

Zaburi 36 - Alur bible

Zaburi 36

¹Camuco pa jadubo wacu yo i adundena kumae, Lworo pa Mungu mbe i wang’e.

²Kum enyayu mutoro i ie gire i wang’e gire, Kara kier pare kud ung’eire man ku judage.

³Lembe mi dhoge gikier man abombi: Eweko bedo riek man timo ber.

⁴Eporo lem kier wi kavuto pare; Ekethre gire i yo ma ber ungo; Edagu lem ma rac ungo.

⁵Mer mi bero peri, E Yehova, ni i polo; Lemandha peri tundo i polo.

⁶Bedopwe peri calu gudi pa Mungu; Lembapoka peri gi nam ma dit: E Yehova, igwoko dhanu ku yedi.

⁷E Mungu, mer mi bero peri pire tek mire ma! Man nyithindho mi dhanu gipondo the tipopiny mi bombi.

⁸Cwinygi bikwio lwe ku mio mi ot peri; Man ibiketho gimadhu kum kulo ma dit mi mutoro peri.

⁹Kum kulo mi kwo ni i beng’i: I der peri wabineno der.

¹⁰A wek mer mi bero peri gur ni ju m’ung’ei, Man bedopwe peri ni ju ma adundegi atira.

¹¹Kud iyi tielo mi kuhaya bin i kuma, Man kud iyi cing’ jadubo riema woko.

¹²Jutim kier gipodho keca: Juredhogi piny, man gicopo ai ungo.