Read Alur Zaburi 37 Bible Online

Zaburi 37 - Alur bible

Zaburi 37

¹Cwinyi kud uring kum jutim rac, Kadok kumira de kud utimi kum ju m’utimo gondri.

²Kum fodi nyanok jubinyarugi piny calu lum, Man gibiner calu uboko ma numu.

³Gen Yehova, man itim ber; Ka kumeno ibibedo i ng’om, man ibicamu m’ibedo agwoka.

⁴Anyong’a bende negi giri i Yehova; Man ebimio iri yeny ma adundeni yenyo.

⁵Wek yo peri ba Yehova; Gene bende, man ebiketho etimbre.

⁶Man ebiwodho bedopwe peri calu der, Man pokolembe peri calu dieceng’.

⁷Yom i Yehova, man ikure ku twiocwiny: Cwinyi kud uring kum ng’atu ma yo pare bedo miero, Kum ng’atu m’uketho lembapora ma rac utimbre.

⁸Wek ng’ecwiny, man ikwer kwinyo: Cwinyi kud uringi, imaru mondo i kier.

⁹Kum jubikabu jutim rac woko; Ento ju m’ukuro Yehova, gibicamu ng’om ni aba.

¹⁰Kum i nindo ma nyanok ci, e judubo bibedo mbe: Eyo, ibiparu pi kakare cu, e ebibedo mbe.

¹¹Ento ju ma mol gibicamu ng’om ni aba, Man gibinyayu mutoro i igi gigi kum dit mi kwiocwiny.

¹²Jadubo poro lembe kum won bedopwe. Man ekayu lake i wie.

¹³Rwoth bing’iere; Kum eneno nia ceng’ pare bebino.

¹⁴Judubo giwodho palamularu, man gigomo atum migi, Kara giredh jacan ku jacanpiny, Kara gineg wadi dhanu m’ubedo atira i yo.

¹⁵Palamularu migi bimondo i adundegi gigi, Man atum migi bitur.

¹⁶Gin ma nok pa won bedopwe e ber ma sagu Piny ma dit mi judubo dupa.

¹⁷Kum bot judubo bitur; Ento Yehova jengo weg bedopwe.

¹⁸Yehova ng’eyo nindo mi ju ma cu; Man aba migi bibedo mi nja.

¹⁹Jubiketho lewic i wigi ngo i nindo ma rac; Man gibiyeng’ i nindo mi ndru.

²⁰Ento judubo birwinyo, Man judegi pa Yehova bibedo calu mio mi nyithi rembe: Gibithum; gibithum calu yiro.

²¹Judubo gamu banja, man e Culo ngo; Ento won bedopwe timo ku bero, man emio.

²²Kum wadi ju m’emio mugisa igi gibicamu ng’om ni aba; Man ju m’ekwong’ogi jubikabugi woko.

²³Yehova ketho woth mi dhanu cungo; Man anyong’a nege i yo pare.

²⁴Kadok epodho, jubiredhe piny ma gwei ungo; Kum Yehova ting’e ku cinge.

²⁵Naka an a aradu, kawono ati; Ento fodi aneno won bedopwe ngo ma jukuno, Kadi kodhine m’ukwayu kwen.

²⁶Etimo ku bero ceng’ du, man emio banja; Man kodhine nwang’u mugisa.

²⁷Ai kud i dubo, man itim ber; Man ibed mi nja.

²⁸Kum Yehova maru bedopwe, Man ekuno jumaleng’ pare ngo; Gibedo agwoka mi nja: Ento jubikabu kodhi mi judubo woko.

²⁹Won bedopwe bicamu ng’om ni aba, Man ebibedo i ie mi nja.

³⁰Dhu won bedopwe weco pi rieko, Man lebe yero pokolembe.

³¹Cik pa Mungu pare ni i adundene; Dakutielo pare moko mbe ma bikier.

³²Jadubo libo won bedopwe, Man eyenyo kanege.

³³Yehova biweke i cinge ngo, Kadi ebigonje ngo kinde ma lembe pare pokre.

³⁴Kur Yehova, man imok kum yo pare; Man ebiyungi kara icam ng’om ni aba: Kinde ma jukabu judubo, ibineno maeni.

³⁵Aneno jadubo ma won tego ma dit, M’ebejany gire calu yen m’udinyo i ng’om m’etwi i ie.

³⁶Ento ng’atu moko kadhu, man nen, embe: Eyo, ayenye, ento enwangre ngo.

³⁷Nen ng’atu ma cu, man ng’i ng’atu m’atira; Kum kajik pa ng’atu ma won kwiocwiny e ber.

³⁸Jucam co, jubinyothogi karacelo: Jubikabu kajik mi judubo.

³⁹Ento both mi weg bedopwe ai ba Yehova: En e ka ma tek migi i nindo mi can.

⁴⁰Man Yehova konyogi, elarugi de: Elarugi ni judubo, man ebodhogi, Kum gipondo i bang’e.