Read Alur Zaburi 44 Bible Online

Zaburi 44 - Alur bible

Zaburi 44

¹Wawinjo ku ithwa, E Mungu, Kwaruwa giweco iwa, Pi tic m’itimo i nindo migi, I nindo ma con.

²Iriemo thek woko ku cingi; Ento gin re ipidhogi: Isendo kodhidhanu; Ento gin imoyogi mba mba.

³Kum gimwonyo ng’om ungo ku pala mularu migi, Kadok botgi gigi de bodhogi en ungo; Ento cingi ma yor acwic, man boti, man der mi weng’i, Kum ibedo ku bero i kumgi.

⁴In i Ubimo para, E Mungu: Ng’ol both ni Yakobo.

⁵Wabiredho jusendwa ni kumi: Wabinyono ju m’uai i kumwa ni kum nyingi.

⁶Kum abigeno atum para ngo, Kadok palamularu para de bibodha ngo.

⁷Ento ibibodhowa ni jusendwa, Man inyayu lewic i kum ju m’udaguwa.

⁸Walula ni kum Mungu ceng’ du, Man wabifoyo nyingi mi nja. [Sela.

⁹Ento kawono ibayuwa, man iranjuwa, Man icidho woko ngo karacelo kud udul mwa.

¹⁰Iketho waloko ng’eiwa ni jasend: Man ju m’udaguwa biyaku ayeki igi gigi.

¹¹Idwokowa calu rombe mir acama, Man ikethowa i kind thek.

¹²Iloko dhanu peri ku gin moko ngo, Man inwang’u kuloka ngo ku welpiny migi.

¹³Idwokowa ni cac ni judhugola mwa. Cac ku ng’iero ni ju m’utiekowa gbur.

¹⁴Idwokowa ni koi i kind thek, Ni yengowic i kind kodhidhanu.

¹⁵Ceng’ du lewic para ni i wang’a, Man lewic mi wang’a uma,

¹⁶Kum dwand ng’atu m’ucayu cac man m’uyero lembacidi, Ni kum jadegi man jaculkwor.

¹⁷Maeni ceke wok i kumwa; ento fodi wiwa wil i kumi ngo, Kadok lembariba peri de watimo kud abombi ngo.

¹⁸Adundewa lokre cen ungo, Kadok tiendwa de kier ungo kud i yo peri,

¹⁹Man iturowa rac i ka ma utho ni i ie, Man iumowa ku tipopiny mi tho.

²⁰Tek wiwa wil kum nying’ Mungu mwa, Kadi tek warieyo cingwa ba mungu mange;

²¹Mungu biyenyo maeni ngo? Kum eng’eyo lembamung’a mir adunde.

²²Eyo, junegowa piri ceng’ du; Jukwanuwa calu rombe mir athuma.

²³Ceu, nedi inindo, E Rwothi? Ai, kud ibaiwa mi nja.

²⁴Ipanu weng’i nedi, Man wii wil kum ruvwa mwa ku masendi mwa?

²⁵Kum ng’eyong’ec mwa gung’ piny i utur: Kumwa moko kum ng’om.

²⁶Ai ni kony mwa, Man iwarwa ni kum mer mi bero peri.