Read Alur Zaburi 48 Bible Online

Zaburi 48 - Alur bible

Zaburi 48

¹Yehova e dwong’, man e dit mir apaka, I adhura pa Mungu mwa, i got pare ma leng’.

²Leng’ i kadongone, mutoro mi ng’om yu, En e got Sayuni, i ng’ete ma yor ariwa ma malu, Adhura p’Ubimo ma dwong’.

³Mungu ketho jung’eye i udiker pare ni kapondo.

⁴Kum nen, ju m’ubimo gicokri gigi, Gikadhu karacelo.

⁵Gineno maeni, e igi wang’ lii; Cwinygi ng’abre, giringo pio.

⁶Mielkum umakugi kuca, Remokum, calu pa dhaku m’unyol.

⁷Ituro combo mi Tarcic, Ku yamu ma yo nyangu.

⁸Calu wawinjo, waneno kumeca I adhura pa Yehova mir udul, i adhura pa Mungu mwa: Mungu biketho ecungo mi nja. [Sela.

⁹Wapido pi mer mi bero peri, E Mungu, I die hekalu peri.

¹⁰Calu nyingi bedo, E Mungu, Pak peri bedo kumeno cil i tung’ ng’om: Cingi ma yor acwic upong’ ku bedopwe.

¹¹Wek anyong’a neg got Sayuni, Wek anyong’a neg nyig Yuda, Kum pokolembe peri.

¹²Wuwoth kum Sayuni, man wudhoke; Wukwan odkurne;

¹³Wuketh cwinywu kum ka ma tek pare; Wupar pi udiker pare: Kara wuyer pire ni dhanum’utuk ma cen.

¹⁴Kum Mungu maeni en e Mungu mwa mi nja: Ebibedo jatel wiwa cil kum tho.