Read Alur Zaburi 5 Bible Online

Zaburi 5 - Alur bible

Zaburi 5

¹Cik ithi kum lembe para, E Yehova, Ii pid pi lembapida para.

²Winj badwal mi ywak para, Ubimo para, man Mungu para; Kum arwo iri.

³E Yehova, kugweno ibiwinjo dwanda; Kugweno abiyiko rwo para iri, man abikuro.

⁴Kum in i Mungu ma anyong’a negi ngo kum dubo: Lem ma rac bibedo ngo kudi.

⁵Ju ma yungri gigi bicungo ngo i weng’i: Idagu jutim kier ceke.

⁶Ibinyotho ju ma yero ndra: Yehova dagu ng’atu ma rieu rimo nege man jabombi de.

⁷Ento an, i dit mi mer mi bero peri abimondo i ot peri: Abirwo yo ba hekalu peri ma leng’ ni kum lworo peri.

⁸Peya, E Yehova, i bedopwe peri kum judegi para; Dwok yo peri atira i wang’a.

⁹Kum lemandha mbe i dhoggi; Igi en e dubo mandha; Dwandgi en e odliel ma thwolo; Gibombo ku lebgi.

¹⁰Keth lembe i wigi, E Mungu; Wek gipodh ni kum lembapora migi gigi; Riemgi woko i kier migi ma dit; Kum gijai iri.

¹¹Ento wek anyong’a neg dhanu ceke m’upondo i beng’i, Wek gikok thiri thiri ku mutoro, kum icungo i kumgi: Wek ju m’umaru nyingi bende anyong’a neggi ni kumi.

¹²Kum ibimio mugisa ni won bedopwe; E Yehova, ibitieke ku bero calu ku ban.