Read Alur Zaburi 50 Bible Online

Zaburi 50 - Alur bible

Zaburi 50

¹Ng’atu Matek, Mungu, Yehova, eyero, Man elwong’o ng’om ugambre kum kawokceng’ cil kum mwonyne.

²Kud i Sayuni, ma en e leng’ ma njwa, Mungu rieny.

³Mungu mwa bino, man ebedo ling’ ungo: Mac camu i wang’e, Man minopiny ma dit utieke gbur.

⁴Elwong’o ba polo ma malu, Man ba ng’om, kara epok lembe mi dhanu pare:

⁵Cok jumaleng’ para karacelo i bang’a, Ju ma watimo lembariba wakugi ku lam.

⁶Man polo biyero pi bedopwe pare; Kum Mungu en e japoklembe en. [Sela.

⁷Wuwinji, E dhanu para, man abiyero; E Israel, man abituco i beng’i: An a Mungu, Mungu peri.

⁸Abijuki ngo kum lam peri; Man lam m’awang’a peri ni i wang’a thiri thiri.

⁹Abigamu thwoni dhiang’ moko ngo kud i ot peri, Kadi nyogi diegi kud i kwac peri.

¹⁰Kum ku ba yedi ceke m’i luli gi para, Man lim ma ni wi got rubanga rubanga.

¹¹Ang’eyo winyo ceke mi gudi; Man yedi m’i thim gi para.

¹²Tek kec unega, ayero iri ngo; Kum ng’om en e para, ku gin m’upong’ i ie.

¹³Abicamu ring thwoni dhiang’, Kadi abimadhu rimb diegi?

¹⁴Thier lam mi foc ni Mungu; Man itim lembang’ola peri ni Ng’atu ma Malu Ngbir;

¹⁵Man ilwong’a i ceng’ mi can: Abibodhi, man ibiyunga.

¹⁶Ento Mungu wacu ni judubo kumae, Edoko lem peri nia iyer cik para, Man nia igam lembariba para i dhogi,

¹⁷Ma nwang’u idagu ponji, Man ibayu lembe para i ng’ei?

¹⁸Kinde m’ineno jakwo, iyio ire, Man makapiny peri ni karacelo ku weg dubriswa.

¹⁹Imio dhogi ni gin ma rac, Man lebi rebo abombi.

²⁰Ibedo man iyero nying umeru; Ibalu wod meru ma dhe.

²¹Itimo maeni, man abedo ling’; Iwacu nyo a calu wadi in nini: Ento abijuki, man abikethogi kubang’e kubang’e i weng’i.

²²Kawono iwu pid pi maeni, wu ju ma wiwu wil kum Mungu, Amaru yecowu nziki nziki, man ng’atu moko mbe ma bodho:

²³Ng’atu ma tek uthiero lam mi foyofoc nwang’u eyunga; Man ng’atu ma twinyo yo pare Abinyutho ire both pa Mungu.