Read Alur Zaburi 51 Bible Online

Zaburi 51 - Alur bible

Zaburi 51

¹Dong’ kisa negi i kuma, E Mungu, calku mer mi beroni: Calkud udul kisa peri ma ng’ic ruc kier para woko.

²Lwoka ndhu ma njwa ni kier para, Man dwoka leng’ ni dubo para.

³Kum ang’eyo kier para; Man dubo para ni i wang’a thiri thiri.

⁴Adubo iri, ndhu iri, i kendi, Man atimo gin ma rac i weng’i; Kara ibed pwe kan iyero, Man ibed leng’ kinde m’ipoko lembe.

⁵Nen, junyola i kier; Man ma gamu ie m’enyola ko i dubo.

⁶Nen, iyenyo lemandha yor i ic; Man ibiketho ang’eyo rieko i ka m’aponda;

⁷Dwoka leng’ kud alagi, man abibedo leng’: Lwoka, man abibedo tar sagu pei.

⁸Keth awinj mutoro kud anyong’a, Kara anyong’a neg cogo m’ituro.

⁹Pan weng’i ni dubo para, Man ruc kier para ceke woko.

¹⁰Cwi adunde ma leng’ yor i ia, E Mu ngu; Man idwok cwinya nyen atira yor i ia.

¹¹Kud ibaya woko kud i vuti; Man kud ikab Tipo Maleng’ peri kud i bang’a.

¹²Dwok ira mutoro mi both peri; Man ijenga ku cwiny ma wor.

¹³Abilund ponjo juker i yo peri; Man judubo bilokri i beng’i.

¹⁴Bodha ni dubo mi nek, E Mungu, in i Mungu mi both para; Man leba biwero ma tek pi bedopwe peri.

¹⁵E Rwoth, yab dendhoga; Man dhoga binyutho pak peri.

¹⁶Kum imaru lam ungo; kuno di amio: Lam m’awang’a nyayu mutoro ngo ii.

¹⁷Lam pa Mungu en e cwiny m’utur: Adunde m’utur m’udieng’ kum dubo, E Mungu, ibicayu ngo.

¹⁸Tim ber ni Sayuni calu ii yenyo: Goi gang’kidi mi Yerusalem.

¹⁹Anyong’a bilund negi kum lam mi bedopwe. Kum lam m’awang’a ku lam m’awang’a ma bo: Gibilund thiero thwoni dhiang’ wi pemblam peri.