Read Alur Zaburi 55 Bible Online

Zaburi 55 - Alur bible

Zaburi 55

¹Cik ithi kum rwo para, E Mungu; Man kud ipond ni kwac para.,

²Nen bang’a, man ilok ira lembe: Asendra i ywak para, man acur acura,

³Kum dwand judegi, Kum dim ma judubo dimo; Kum gibolo kier i wia, Man gitima rac ku ng’ecwiny.

⁴Adundena remo yor i ia: Man ndiri mi tho podho i wia.

⁵Lw’oro ku mielkum umaka, Man atem uuma.

⁶Man awacu kumae, A dok abedo ku bomb ma calu akuru mire!; Kuno di aringo, man ayom.

⁷Nen, kuno di acidho bor, Kuno di agonjo i yamba. [Sela.

⁸Kuno di aringo pio i kaboth Ni yamu m’ukoto man wavuvu.

⁹E Rwoth, nyoth man ikoi lebgi; Kum aneno rop ku piem i adhura.

¹⁰Dieceng’ ku diewor gidhoke ku wi gang’kidine: Kier bende ku rop ni i kinde.

¹¹Dubo ni i kinde: Dim kud awondi ai ungo kud i gengine.

¹²Kum en e jadegi ngo m’ucaya; Tek kumeno kuno di aciro maeni: Kadi en e ng’atu m’udaga ngo m’eyungre gire i kuma; Kuno di alund apondo ire:

¹³Ento en e in, ma ng’atu ma wada, Jarimba, man jamerna.

¹⁴Waporo lembe ma mit karacelo; Wawotho i ot pa Mungu kud udul dhanu.

¹⁵Wek tho wok i wigi mbwang’, Wek gilor piny ma kwo i liel; Kum dubo ni i kabedo migi, i kindgi.

¹⁶An re, abilwong’o Mungu; Man Yehova bibodha.

¹⁷Uthieno, man kugweno, man dieceng’, abiywak, man abicur acura: Man ebiwinjo dwanda.

¹⁸Ewaru ng’eyong’ec para museme kud i lwiny m’ubino i kuma; Kum ju ma gibino i kuma gi dupa.

¹⁹Mungu biwinjo, man ebiloko lembe igi, En e ng’atu m’ugamu bedo con, [Sela. Gi dhanu m’umbe ku lokri, Man ma lworo Mungu ngo.

²⁰Erieyo cinge kum wadi ju ma gibedo ber kugi: Eturo lembariba pare.

²¹Dhoge foth calu mo dhiang’, Ento ali ni i adundene: Lembe pare yom ma sagu mo, Ento gi palamularu m’arieya.

²²Redh ter peri wi Yehova, man ebijengi: Ebiyio ki ngo ya cwiny weg bedopwe ringi.

²³Ento in, E Mungu, ibiterogi piny i vur mi nyoth: Dhanu ma rieu rimo negogi ma jubombi de gibibedo kwo ngo i ng’et nindo migi; Ento abigeno in.