Read Alur Zaburi 59 Bible Online

Zaburi 59 - Alur bible

Zaburi 59

¹Bodha ni judegina, E Munguna: Ting’a malu ni ju m’uai i kuma.

²Bodha ni jutim kier, Bodha ni dhanu ma rieu rimo negogi.

³Kum, nen, gikanu adhi ni ng’eyong’ec para; Ju ma tek gicokri gigi karacelo i kuma: Kum kier para ngo, kadi kum dubo para de ngo, E Yehova.

⁴Giringo man giyikri gigi ma lembe mbe i wia: Ceu kara ikonya, man inen.

⁵En e in, E Yehova Mungu mir udul, Mungu mir Israel. Ai kara ilieu thek ceke: Kisa kud unegi kum weg kier moko ma judubo. [Sela.

⁶Gidwogo uthieno, giywak calu gwok, Man gitieko adhura gbur.

⁷Nen, githwogo lembe kud i dhoggi; Palamularu ni i dendhoggi: Kum giwacu kumae, Ng’a m’uwinjo?

⁸Ento in, E Yehova, ibing’ierogi; Ibicayu thek ceke.

⁹Tegona, abiketho cwinya i kumi; Kum Mungu en e ot ma tek para ma wiu.

¹⁰Munguna birombo kuda ku mer mi bero pare, Mungu biyio anen yeny ma ia yenyo kum judegina.

¹¹Kud ineggi, wi dhanu para maru wil: Lalgi ku tego peri, man ijwiggi, E Rwoth ma ban mwa.

¹²Kum dubo mi dhoggi, man lembe mi dendhoggi, Wek jumakgi i kuhaya migi, Man kum kwong’ ku ndra ma giyero.

¹³Dargi ku kwinyo, dargi, ketho nia ku gibed nuti kendo: Man wek ging’ei nia Mungu bimo i Yakobo, Cil kum tung’ ng’om. [Sela.

¹⁴Man uthieno wek gidwogi, wek giywak calu gwok, Man gitiek adhura gbur.

¹⁵Gibiwotho kun ku kun ku yenyo cam, Gibibedo ku diewor soro tek giyeng’ ungo.

¹⁶Ento abiwero pi tego peri; Eyo, abiwero ma tek kugweno pi mer mi bero peri: Kum idaru bedo ot ma tek para ma wiu, Man kapondo para i ceng’ mi lem ma tek para.

¹⁷E tego para, abiwero pak iri: Kum Mungu en e ot ma tek para ma wiu, Mungu mi kisa para.