Read Alur Zaburi 62 Bible Online

Zaburi 62 - Alur bible

Zaburi 62

¹Ng’eyong’ec para kuro Mungu kende ti: Both para ai i bang’e.

²En kende e cana para ku both para: En e ot ma tek para ma wiu; cwinya biringo hai ungo.

³Wubigoyo korwu kum ng’atu moko rokani, Kara wunege, kewu ceke, Calu gang’ m’ulengre, calu cei ma dhanga dhanga?

⁴Giporo lembe kende kara giredhe piny kud i dwong’ pare; Anyong’a negogi kum ndra; Gimio mugisa ku dhoggi, ento gikwong’o kwong’ yor i igi. [Sela.

⁵Ng’eyong’ec para, kur Mungu kende ti; Kum genogen para ai i bang’e.

⁶En kende e cana para ku both para: En e ot ma tek para ma wiu; cwinya biringo ngo.

⁷Both para ku dwong’ para ni ku Mungu: Cana mi tego para, ku kapondo para, ni ku Mungu.

⁸Wugene i nindo ceke, wu dhanu; Wukonj adundewu woko i wang’e: Mungu en e kapondo iwa. [Sela.

⁹Andha dhanu ma sai gi mananu, man dhanu ma dwong’ gi ndra: Gibiidho malu i mukero; Gibedo yot karacelo ma sagu mananu.

¹⁰Kud wugen rop, Man kud wudok jukuhaya kud ayeki: Tek lonyo nyai, kud wuketh adundewu i kume.

¹¹Mungu yero wang’ acel, Awinjo maeni wang’ ario, Nia tego en e pa Mungu.

¹²E Rwoth, mer mi bero bende en e peri; Kum imio ni dhanu ceke kubang’gi kubang’gi ng’atuman calku tic pare.