Read Alur Zaburi 69 Bible Online

Zaburi 69 - Alur bible

Zaburi 69

¹Bodha, E Mungu; Kum pi mondo ba ng’eyong’ec para.

²Amwony i codho ma thuth, ka ma kacungo mbe: Awok i pi ma thuth, ka ma pi m’ucore uma i ie.

³Aol ku ywak para; dwanda tal: Wang’a umbre kinde m’akuro Mungu para.

⁴Ju m’udaga mananu gi dit ma sagu yukwia: Ju ma giyenyo gikaba woko, ma gi judegina mi ndra, gi tek: Juketho adwoko, gin m’ating’o ngo.

⁵E Mungu, ing’eyo kasegu para; Man dubo para pandre ngo iri.

⁶Kud iyi lewic umak ju m’ukuri ni ku ma, E Rwoth Yehova mir udul: Kud iyi ju m’uyenyi ujwik ni kuma, E Mungu mir Israel.

⁷Kum ayeyo cac ni kumi; Lewic uumo wang’a.

⁸Adoko jawirok ni utumira, Man jakamange ni nyithindho pa ma.

⁹Kum ngiri mi ot peri cama; Man cac mi ju m’ucei podho i wia.

¹⁰Kinde m’aywak, man aponjo ng’eyo ng’ec para ku kwiro cam, Maeni bedo ni cac para.

¹¹Kinde m’aketho gonia ni kendi para, Adoko ni koi igi.

¹²Ju m’ubedo dhugang’ giweco pira; Man an a wer mi weg andrej giramadha.

¹³Ento an, rwo para ni i beng’i, E Yehova, i nindo ma yire: E Mungu, ni kum dit mi mer mi bero peri, Dwok ira lembe i lemandha mi both peri.

¹⁴Bodha kud i codho, man kud iwek amwony: Bodha ni ju m’udaga, man kud i pi ma thuth.

¹⁵Kud iwek pi um wia, Kadok pi ma thuth de kud iwek emwonya; Man kud iwek vur urieb dhoge i wia.

¹⁶Lok ira lembe, E Yehova; kum mer mi bero peri e ber: Calkud udul kisa peri ma ng’ic dwog i bang’a.

¹⁷Man kud ipan weng’i ni jatic peri; Kum ani i can; dwok ira lembe pio.

¹⁸Cor ceng’ni ng’eyong’ec para, man iware: Wara ni kum judegina.

¹⁹Ing’eyo cac para, ku lewic para, ku jwik para: Jusend para ceke ni i weng’i.

²⁰Cac uturo adundena; man lembe nura hai: Man aneno nyo jumoko bedo ku ngisi, ento jumoko mbe; Man pi jujuk, ento anwang’u moko ngo.

²¹Gimio ulecu bende ni cemo para; Man kinde ma rieu nega gimio ira picwa amadhi.

²²Wek mesa migi dok ni uwic i wang’gi; Man kinde ma cwinygi kwio, wek edok ni ngbak.

²³Wek wang’gi cidi, kara ku ginen; Man keth piergi miel thiri thiri.

²⁴Konj kwinyo peri i wigi, Man wek lak ng’ecwiny peri rubgi.

²⁵Wek kabedo migi dok ni uvuru; Ng’atu moko kud ubed i hema migi.

²⁶Kum gisendo ng’atu m’igoye; Man giyero pi remokum mi ju m’itong’o lero i kumgi.

²⁷Med kier kum kier migi; Man kud iwek gimond i bedopwe peri.

²⁸Wek juyweigi woko ku i kitabu mi kwo, Man ku jugorgi karacelo ku weg bedopwe.

²⁹Ento an a jacan man i remokum: Wek both peri, E Mungu, ketha malu.

³⁰Abipaku nying’ Mungu ku wer. Man abiyunge ku foyofoc.

³¹Man ebinyayu mutoro i Yehova ma sagu koni dhiang’, Kadi thwoni dhiang’ ma ju tunge kud utwenge.

³²Ju ma mol gineno maeni, man anyong’a negogi: Wun ma wuyenyo Mungu, wek adundewu bed kwo.

³³Kum Yehova winjo jacanpiny, Man ecayu jukol pare ngo.

³⁴Wek polo ku ng’om upake, Nam, ku gin ceke ma wotho i ie.

³⁵Kum Mungu bibodho Sayuni, man ebigomo adhura mi Yuda; Man gibibedo keca, man gibibedo kude ni musolu.

³⁶Kodhi mi jutic pare bende bibedo kude ni musolu; E ju m’umaru nyinge bibedo i ie.