Read Alur Zaburi 71 Bible Online

Zaburi 71 - Alur bible

Zaburi 71

¹E Yehova, apondo i beng’i: Kud iwek lewic umaka ki.

²Bodha ni kum bedopwe peri, man ilara: Leng’ ithi i bang’a, man ibodha.

³Bed ira ni cana mi bedo, ka m’acidh i ie thiri thiri; Ing’olo lembe mi bodha; Kum in i cana para man ot ma tek para.

⁴Bodha, E Mungu para, kud i cing’ ja dubo. Kud i cing’ won gondri man jarop.

⁵Kum in i genogen para, E Rwoth Yehova: In i genogen para ugambre kum aradu para.

⁶Ajengra ni kumi ugambre kud i ic; Iwodha in kud i ma: Pak para bibedo i kumi thiri thiri.

⁷Abedo ni ginmawang’uijo ni dhanu dupa; Ento in i kapondo para ma tek.

⁸Dhoga bipong’ ku pak peri, Man ku yung peri ceng’ du.

⁹Kud ibaya i nindo mi tio; Kud ikuna kinde ma tego para doko nok.

¹⁰Kum judegi para giyero pira; Man ju m’ulibo ng’eyong’ec para giporo lembe karacelo,

¹¹Giwacu kumae, Mungu kune: Wurieme man wumake; kum ng’atu moko mbe m’ubodhe.

¹²E Mungu, kud ibed bor kuda; E Mungu para, tim pio ikonya ko.

¹³Wek ju ma gi jusend ng’eyong’ec para lewic umakgi man githum; Wek cac ku jwik uum ju m’uyenyo lem ma rac i kuma.

¹⁴Ento abigeno thiri thiri, Man abicikupeki kendo kendo.

¹⁵Dhoga biyero pi bedopwe peri, Man pi both peri ceng’ du; Kum ang’eyo welne ngo.

¹⁶Abibino ku tego pa Rwoth Yehova: Abiyero pi bedopwe peri, ndhu peri i kendi.

¹⁷E Mungu, iponja ugambre kum aradu para; Ugambre con cil ku kawono de ayero pi tic peri ma wang’u ijo.

¹⁸Eyo, cil kinde m’ati man wia ju lwar, E Mungu, kud ikuna, Cil m’abiyero pi tego peri ni dhanum’utuk mange, Pi tego peri ni dhanu ceke m’ubino kubang’gi kubang’gi.

¹⁹Bedopwe peri bende, E Mungu, eni malu hai; In m’itimo gin ma dwong’, E Mungu, ng’a ma calu ini?

²⁰In, m’inyutho iwa can dupa man ma rac, Ibiketho wakwo kendo. Man ibiting’owa kendo kud i thuth m’i ng’om.

²¹Med dwong’ para, Man ilokri kendo ijuka de.

²²Abipeki de ku nanga, Cil lemandha peri, E Mungu para: Abiwero pak iri kud adungu, In i Ng’atu Maleng’ mir Israel.

²³Dendhoga bikok kud anyong’a kinde m’awero pak iri; Man ng’eyong’ec para, m’iwaru.

²⁴Leba bende biyero pi bedopwe peri ceng’ du; Kum ju m’uyenyo gitima rac lewic umakugi, cwinygi de ng’abre.