Read Alur Zaburi 72 Bible Online

Zaburi 72 - Alur bible

Zaburi 72

¹Mi lembapoka peri ni ubimo, E Mungu, Man bedopwe peri ni wod ubimo.

²Ebipoko lembe mi dhanu peri ku bedopwe, Man jucan peri ku lembapoka.

³Gudi bikelo kwiocwiny ba dhanu, Man ungulu gudi, ku bedopwe.

⁴Ebipoko lembe mi jucan mi dhanu, Ebibodho nyithi jucanpiny, Ebituro jasend nziki nziki.

⁵Gibilwori kinde ma ceng’ nuti, Man cil ma dwi nuti, cil kum dhanum’utuk ceke.

⁶Ebiloro piny calu koth wi lum ma junyaru, Calu koth ma cwi wi ng’om.

⁷Lembe bibedo miero ni ng’atu ma pwe i nindo pare, Man kwiocwiny ma dit, cil ma dwi bithum ko.

⁸Ebibimo bende gambre i nam cil kum nam, Man ugambre kum Kulo cil kum gund ng’om.

⁹Ju m’ubedo i langa birum i wang’e; Man judegi pare binang’u utur.

¹⁰Ju m’ubimo mi Tarcic man mi songa gibikelo ajok: Ju m’ubimo mi Ceba ku Seba gibithiero girathiera.

¹¹Eyo, ju m’ubimo ceke bipodho piny i wang’e; Thek ceke bitimo ire.

¹²Kum ebibodho jacanpiny kinde m’eywak, Man jacan, ma jakonyne mbe.

¹³Ngisi binege kum ng’atu ma adhura ku jacanpiny, Man ebibodho ng’eyong’ec mi jucanpiny.

¹⁴Ebiwaru ng’eyong’ec migi ni dim ku rop; Man pi rimbgi bibedo tek i wang’e:

¹⁵Man gibibedo kwo; man jubimio ire kum mola ma kwar mi Ceba: Man dhanu birwo pire thiri thiri; Gibimio mugisa ire ceng’ du.

¹⁶Cam bibedo dit i ng’om wi gudi; Nyinge biyengre calu Lebanon: Man lembe mi dhanu mir adhura bibedo miero calu lum mi ng’om.

¹⁷Nyinge bibedo mi nja; Nyinge bibedo cil ma ceng’ nuti: Man dhanu binwang’u mugisa ni kume; Thek ceke bilwong’e jamutoro.

¹⁸Mugisa ni Yehova Mungu, Mungu mir Israel, M’e kende m’etimo gin ma wang’uijo;

¹⁹Man mugisa mak nyinge mi dwong’ mi nja; Man wek ng’om ngung’ upong’ ku dwong’ pare. Amen, man Amen.

²⁰Rwo pa Daudi ma wod Yese thum.