Read Alur Zaburi 77 Bible Online

Zaburi 77 - Alur bible

Zaburi 77

¹Abiywak ba Mungu ku dwanda, Ndhu ba Mungu ku dwanda; man ebiciko ithe i bang’a.

²I ceng’ mi can para ayenyo Rwoth: Cinga rieire ku diewor, man edole ngo; Ng’eyong’ec para kwero juk.

³Apoi kum Mungu, man ia pido: Aywak, man tipona voc. [Sela.

⁴Imaku kur mi wang’a: Can unega dit ketho acopo weco ngo.

⁵Ia pido pi nindo ma con, Rundi mi nindo ma con.

⁶Apoi kum wer para ku diewor: Amung’ kud adundena gira; Man tipona yenyo ngili ngili.

⁷Rwoth bibayu mi nja? Man ebibedo ku bero kendo ngo?

⁸Mer mi bero pare thum pet mi nja? Lembang’ola pare rem rundi ku rundi?

⁹Wi Mungu wil kum bero pare? Eciko ba kisa pare ma ng’ic ku ng’ecwiny pare? [Sela.

¹⁰Man awacu kumae, Maeni mulima para; Ento abipoi kum rundi mi cing’ ma yor acwic pa Ng’atu ma Malu Ngbir.

¹¹Abiweco pi tic pa Yehova; Kum abipoi pi tic peri ma wang’u ijo ma con.

¹²Ia bipido bende kum tic peri ceke, Man abiparu pi tic peri.

¹³E Mungu, yo peri ni i kamaleng’: Ng’a ma mungu ma dit calu Mungu?

¹⁴In i Mungu ma timo gin ma wang’u ijo: Iketho tego peri ng’eire kind kodhidhanu.

¹⁵Iwaru dhanu peri ku boti, Wot Yakobo ku Yusuf. [Sela.

¹⁶Pi neni, E Mungu; Pi neni, lworo negogi: Pi ma thuth bende yengre.

¹⁷Afuru konjo pi; Polo wodho dwal: Athero peri bende ringo mba.

¹⁸Dwand morpolo peri bedo i vira; Lukoth ucaru ng’om: Ng’om umiel man eyengre.

¹⁹Yo peri bedo i nam, Man yo peri i pi ma dit, Man dakutielo peri jung’eyo ngo.

²⁰Itelo wi dhanu peri calu udul rombe, Ku cing’ Musa ku Harun.