Read Alur Zaburi 78 Bible Online

Zaburi 78 - Alur bible

Zaburi 78

¹Wucik ithwu kum cik para, E dhanu para: Wuleng’ ithwu ba lembe mi dhoga.

²Abialu dhoga ku lembabola; Abiyero lembe ma there tek ma con,

³Ma wawinjo wang’eyo de, Man kwaruwa yero iwa.

⁴Wabipanugi ngo ni nyithindho migi, Ma wabeyero pak pa Yehova ni dhanum’utuk ma bibino, Ku tego pare, man tic pare ma wang’u ijo m’etimo.

⁵Kum eketho lembatuca cungo kum Yakobo, Man eng’olo cik ni Israel, M’eng’olo ni kwaruwa, Kara giketh ging’eiri ni nyithindho migi;

⁶Kara dhanum’utuk ma bibino ging’ei, en e nyithindho ma jubinyologi; Ma biai biyerogi ni nyithindho migi.

⁷Kara giketh genogen migi ba Mungu, Man wigi kud uwu pi tic pa Mungu, Endre giwor lembang’ola pare.

⁸Man ku gibed calu kwaru migi, Dhanum’utuk ma juco man jung’ai, Dhanum’utuk ma yiko adundegi ngo, Man ma cwinygi moko ngo kum Mungu.

⁹Nyithindho pa Efraim, ma gi weg jamtho ma gibewotho kud atum de, Gilokri cen i ceng’ mi lwiny.

¹⁰Giworo lembariba pa Mungu ngo, Man gikwero wotho ku cik pare;

¹¹Man wigi wil kum tic pare, Ku tic pare ma wang’u ijo m’enyutho igi.

¹²Etimo gin ma wang’u ijo i wang’ kwaru migi, I ng’om Misiri, i podho mi Zoan.

¹³Eng’enyo nam, man eketho gikadhu kud i ie; Man eketho pi cungo calu thuthu.

¹⁴Dieceng’ bende etelo wigi kud afuru, Man diewor soro ku der mi mac.

¹⁵Eng’enyo cana i yamba, Man emio igi giramadha ma dit calu m’uai i pi ma thuth.

¹⁶Ewodho kulo bende kud i cana, Man eketho pi mol piny calu kulo ma dit.

¹⁷Ento gicikudubo asu ire, Gicikujai kum Ng’atu ma Malu Ngbir i ng’om ngele.

¹⁸Man gibidho Mungu i adundegi Ku penjo cemo calku yeny ma igi yenyo.

¹⁹Eyo, giyero lembe kum Mungu; Giwacu kumae, Mungu copo yiko mesa i langa

²⁰Nen, egoyo cana, ketho pi thwogre woko, Man kulo pong’ hau; Ecopo mio kwen bende? Ebimio ring’o ni dhanu pare?

²¹Ka kumeno Mungu winjo, man kwinyo nege; Man mac uopo kum Yakobo, Man ng’ecwiny bende idho malu kum Israel;

²²Kum giyio Mungu ngo, Man gigeno both pare ngo.

²³Ento eng’olo ni afuru ma malu, Man eyabu dhugola mi polo;

²⁴Man ekonjo mana i wigi gicam, Man emio igi cemo kud i polo.

²⁵Dhanu camu kwen pa ng’atu ma tek: Eoro igi cemo mi yeng’o.

²⁶Eketho yamu ma yo nyangu koto i polo; Man ku tego pare etwinyo yamu ma yor ariwa ma piny.

²⁷Ecoro ring’o bende i wigi calu utur, Man winyo ma ju bombe calu kwio ma dhu nam:.

²⁸Man eweko epodho i die kagonjo migi, I ng’et kabedo migi gbur.

²⁹Kum kumeno gicamu, man giyeng’ dit; Man emio igi yeny ma igi yenyo.

³⁰Fodi gikoc ungo ku yeny ma igi yenyo, Cemo migi fodi ni i dhoggi,

³¹Kinde ma ng’ecwiny pa Mungu bino wigi, Man enego ju m’ucwe mi kindgi, Man egoyo awobi mir Israel piny.

³²Ento gidubo asu, Man giyio tic pare ma wang’u ijo ngo.

³³Ka kumeno edaru nindo migi ku lembe ma kite mbe, Man rundi migi ku ndiri.

³⁴Kinde m’enegogi, gilund giyenye; Man gidwogo giyenyo Mungu kud amora.

³⁵Man gipoi ya Mungu en e cana migi, Man Mungu ma Malu Ngbir en e jawar migi.

³⁶Ento giyero lembe ire mit mananu ku dhoggi, Man gicwayu ire lembe ku lebgi.

³⁷Kum adundegi bedo atira ngo ire. Kadi kum lembariba pare de gibedo mandha ngo.

³⁸Ento en, ma kisa nege, eweko kier migi woko, man enyothogi ngo, Eyo, eloko ng’ecwiny pare cen nindo dupa, Man etugo kwinyo pare ceke ngo.

³⁹Man epoi nia gi ring’kum kende, Yamu ma kadhu woko, man ma dwogo kendo ngo.

⁴⁰Gijai ire i langa wang’ udul, Man ginyayu can i ie i ng’om ngele mire ma!

⁴¹Man gilokri kendo gibidho Mungu de, Man ginyayu ng’ecwiny i Ng’atu Maleng’ mir Israel.

⁴²Gipoi kum cinge ngo, Kadi ceng’ m’ewarugi i ie ku ba jasend;

⁴³Maram eketho ko giranyutha pare i Misiri, Man musana pare i podho mi Zoan,

⁴⁴Man eloko kulo migi ma dit ni rimo, Man kulo migi ma nok, kara ku gimadhi.

⁴⁵Eoro udul ulwang’ni i kindgi, m’ucamugi; Man ungwal, m’unyothogi.

⁴⁶Emio nyai migi bende ni ukoko, Man tic mi muli migi ni bonyo.

⁴⁷Enyotho ulok migi ku pei, Man yendulemo migi ku pei ma dit.

⁴⁸Emio lim migi bende ni pei, Man udul rombe migi ni lukoth ma lieth.

⁴⁹Man ebolo ng’ecwiny pare ma lake tek i wigi, Kwinyo, ku ng’ecwiny, man can, Udul malaika mi lem ma rac.

⁵⁰Etimo wang’ayo ni ng’ecwiny pare; Ecero ng’eyong’ec migi ngo ni tho, Ento emio kwo migi ni thong’om,

⁵¹Man egoyo kayu ceke mi Misiri, Landu tego migi i hema pa Ham.

⁵²Ento etelo wi dhanu pare ma dhe calu rombe, Man etelo wigi i langa calu udul rombe.

⁵³Etelo wigi museme, ketho lworo negogi ngo; Ento nam umwonyo judegi migi.

⁵⁴Man ekelogi ba kieu mi kamaleng’ pare, Ba got maeni, ma cingi ma yor acwic ung’iewo.

⁵⁵Eriemo thek woko bende i wang’gi, Man epokogi ni aba ku thol, Man eketho suru mir Israel gibedo i hema migi.

⁵⁶Ento gibidho man gijai ni Mungu ma Malu Ngbir, Man giworo lembatuca pare ngo;

⁵⁷Ento gilokri, man gitimo awondi calu kwarugi; Gilokri cen calu atum ma rac.

⁵⁸Kum ginyayu ng’ecwiny i ie ku ka ma malu migi, Man ginyayu nyeko i ie kud ayi gin m’acwia m’ang’ika,

⁵⁹Kinde ma Mungu winjo maeni, kwinyo nege, Man edagu Israel apila;

⁶⁰Ketho eweko hema mi Cilo, Hema m’eketho i kind dhanu;

⁶¹Man emio tego pare ni ng’eca; Man dwong’ pare i cing’ jasend.

⁶²Emio dhanu pare bende ni palamularu, Kum kwinyo nege kum aba pare.

⁶³Mac ucamu awobi migi; Man nyir migi bedo ku wer mir ambadha ngo.

⁶⁴Julam migi podho ku palamularu; Man mon migi ma coggi tho giywak ungo.

⁶⁵Rwoth ulund uceu calu ng’atu moko kud i wang’ nindo, Calu ng’atu ma tek m’ukok ni kum pigulok.

⁶⁶Man egoyo jusend pare udok cen: Eketho lewic mi nja i wigi.

⁶⁷Mange ke ekwero hema pa Yusuf, Man egoyo wi suru pa Efraim ungo,

⁶⁸Ento egoyo wi suru pa Yuda, Got Sayuni m’emaru.

⁶⁹Man egomo kamaleng’ pare calu lwith got, Calu ng’om m’eketho cungo mi nja.

⁷⁰Egoyo wi Daudi bende ma jatic pare, Man ewodhe kud i kwac mi rombe:

⁷¹Ewodhe ku tok rombe m’ubedo ku nyithindhgi, Kara ebed jakwac pa Yakobo ma dhanu pare, man Israel ma aba pare.

⁷²Kum kumeno en e jakwac migi calku bedocu mir adundene, Man etelo wigi ku rieko mi cinge.