Read Alur Zaburi 81 Bible Online

Zaburi 81 - Alur bible

Zaburi 81

¹Wuwer ma tek ba Mungu ma tego mwa: Wukok ku mutoro ni Mungu pa Yakobo.

²Wuting’ wer, man wukel umbukulumbu, Adungu ma ber ku nanga.

³Wukudh agwara mi lakdwi, Ceng’ mi dwi ma dit, ceng’ mir agba mwa.

⁴Kum en e cik mir Israel, Lembapoka pa Mungu pa Yakobo.

⁵Eng’ole ni lembatuca ni kum Yusuf, Kinde m’ecidho woko i ng’om Misiri, Ka m’awinjo ie dhok m’ang’eyo ngo.

⁶Akabu goke ku kum ter: Cinge ai ku kum katoko.

⁷Ilwong’o i can, man abodhi; Aloko iri lembe i ka m’ipondo ni morpolo, Amulo ii kum pi mi Meriba. [Sela.

⁸Winji, E dhanu para, man abituco iri: E Israel, tek iwinjo dwanda!

⁹Mungu ma jawirok bibedo ii ngo; Kadok mungu ma jawirok de ibirwo ire ngo.

¹⁰An a Yehova Mungu peri, M’uwodhi malu kud i ng’om Misiri: Yab dhogi ma lac, man abipong’e.

¹¹Ento dhanu para gi winjo dwanda ngo; Man Israel giyenya ki ngo.

¹²Kum kumeno aweko gilub tok lembe ma adundegi yenyo, Kara giwoth ku lembapora migi gigi.

¹³A tek dhanu para giwinjo dwanda, Tek Israel uwotho i yo para!

¹⁴Kuno di asagu judegi migi pio, Man aloko cinga kum jusend migi.

¹⁵Kuno di judegi Yehova gijwigri gigi ire: Ento nindo migi kuno di bedo mi nja.

¹⁶Kuno di eketho gicamu mor nganu bende; Man kuno di ayeng’i ku kic m’i cana.