Read Alur Zaburi 83 Bible Online

Zaburi 83 - Alur bible

Zaburi 83

¹E Mungu, kud ibed ling’: Cwinyi kud ukwi, man kud ibed ling’, E Mungu.

²Kum, nen, judegi peri giyakni: Man ju m’udegi giting’o wigi malu.

³Giporo lembe ku rieko kum dhanu peri, Man giporo lembe karacelo kum dhanu peri m’upondo.

⁴Giwacu kumae, Wubin, man wek wakebugi woko ku gibed ni thek; Kara ku jupoi kendo kum nying Israel.

⁵Kum giporo lembe karacelo ku igi acel; Giribo lembe i kumi:

⁶Hema pa Edom man Juicmaeli; Moab, ku Juhagari;

⁷Gebal, man Amon, man Amalek; Filistia ku ju m’ubedo i Turo;

⁸Ascur bende ribri kugi; Gikonyo nyithindho pa Lot. [Sela.

⁹Tim i kumgi calu kum Midian, Calu kum Sisera, calu kum Yabin, ba kulo Kicon;

¹⁰Ma ginyothri ba En-dor, M’udoko calu weyo mi ng’om.

¹¹Dwok weg yung migi calu Oreb ku Zeeb; Eyo, judongomawijo migi ceke calu Zeba ku Zalmuna;

¹²M’uwacu kumae, Wek wagam kabedo pa Mungu Iwa giwa ni piny.

¹³E Munguna, dwokgi calu utur mir atido; Calu soka i wang’ yamu.

¹⁴Calu mac ma wang’u luli, Man calu lebmac ma cwinyo gudi,

¹⁵Riemgi kumeno ku wavuvu peri, Man ing’oi ndiri i igi ku vira peri.

¹⁶Pong’ wang’gi kud ang’abacwiny, Kara giyeny nyingi, E Yehova,

¹⁷Wek lewic kud ang’abacwiny umakgi mi nja; Eyo, wek cwinygi ng’abre man ginyothri;

¹⁸Kara ging’ei nia in i kendi, ma nyingi Yehova, Ini Ng’atu ma Malu Ngbir wi ng’om ngung’.