Read Alur Zaburi 84 Bible Online

Zaburi 84 - Alur bible

Zaburi 84

¹Karamb ber mi hema peri mire ma, Ot E Yehova mir udul!

²Ava lelagang’ pa Yehova nego ng’e yong’ec para, eyo, evoc pire; Adundena ku ring’kuma giwer ni mutoro ni Mungu ma kwo.

³Eyo, kira nwang’u ot pare, Man ugwelo unwang’u ot ire gire, ka m’ecopo nyolo ie nyithindhe, En e pemblam peri, E Yehova mir udul, Ubimo para, man Mungu para.

⁴Mugisa ni ju m’ubedo i ot peri: Gibicikupeki. [Sela.

⁵Mugisa ni ng’atu ma tego pare ni i beng’i; Ma yo mi Sayuni ni i adundene.

⁶Ma ka gikadhu kud i poga mi Ywak gidwoke ni ka kulo; Eyo, koth ma kwong’a ume ku mugisa.

⁷Gicidho ba tego ugambre kum tego; Ginyuthri kubang’gi ceke i wang’ Mungu i Sayuni.

⁸E Yehova Mungu mir udul, winj rwo para; Leng’ ithi, E Mungu pa Yakobo. [Sela.

⁹Nen, E Mungu ma ban mwa, Man inen i wang’ ng’atu m’iwiro peri.

¹⁰Kum ceng’ acel i lelagang’ peri e ber ma sagu ceng’ rubanga. Afoyo bedo jakur dhugola i ot pa Mungu para, Sagu bedo i hema mi dubo.

¹¹Kum Yehova Mungu en e ceng’ man ban: Yehova bimio bero man dwong’: Gin moko ma ber umbe m’ebicero ni ju m’uwotho atira.

¹²E Yehova mir udul, Mugisa ni ng’atu m’ugeni.