Read Alur Zaburi 89 Bible Online

Zaburi 89 - Alur bible

Zaburi 89

¹Abiwero pi mer mi bero pa Yehova mi nja: Abiketho bedo mandha peri ng’eire ku dhoga ni dhanum’utuk ceke.

²Kum awacu kumae, Kisa bigombre mi nja; Ibiketho bedo mandha peri cungo i die polo.

³Atimo lembariba ku ng’atu m’agoyo wie para, Akwong’o ni Daudi ma jatic para:

⁴Abiketho kodhini cungo mi nja, Man abigomo komker peri cu ni dhanum’utuk ceke. [Sela.

⁵Man polo bipaku musana peri, E Yehova; Bedo mandha peri bende i cokri mi jumaleng’.

⁶Kum ng’a m’i polo ma jucopo poro ku Yehova? Ng’a ma kind wot ju ma tek ma calu Yehova,

⁷Mungu ma jang’oindiri ma dit i dilo mi jumaleng’, Ma maku julwore ma sagu dhanu ceke m’utieke gburi?

⁸E Yehova Mungu mir udul, Ng’a ma ng’atu ma tek, ma calu in, E Yehova? Man bedo mandha peri tieki gbur.

⁹Ibimo wi ayunga mi nam: Kinde ma mukurane dongo, ikwiogi.

¹⁰Ituro Rahab nziki nziki, calu ng’atu ma junego; Iketho judegi peri ku bot mi tego peri.

¹¹Polo en e peri, ng’om bende en e peri: Ng’om ku gin m’i ie, iketho gicungo.

¹²Yor ariwa ma malu man yor ariwa ma piny, iewiogi: Anyong’a nego Tabor man Hermon ni kum nyingi.

¹³Ibedo ku bot ma tek; Cingi tek, man cingi ma yor acwic ni malu.

¹⁴Bedopwe man pokolembe en e thepiny mi komker peri: Mer mi bero man lemandha cidho i weng’i.

¹⁵Mugisa ni dhanu m’ung’eyo badwal mir anyong’a: E Yehova, giwotho i der mi weng’i.

¹⁶Anyong’a negogi ceng’ du ni kum nyingi; Man judodogi ni kum bedopwe peri.

¹⁷Kum in i dwong’ mi tego migi; Man jubidodo tung mwa ni kum bero peri.

¹⁸Kum ban mwa en e pa Yehova; Man ubimo mwa en e pa Ng’atu Maleng’ mir Israel.

¹⁹Ilund iweco i ginmawokiwang’ mi jumaleng’ peri, Man iwacu kumae, Aketho ng’atu ma tek ni jakony; Adodo ng’atu ma jugoyo wie i kind dhanu.

²⁰Anwang’u Daudi ma jatic para; Awire ku mo para ma leng’.

²¹Cinga bibedo tek i bang’e; Bota bende bidwoke tek.

²²Jadegi bitime tek ungo, Kadi wod dubo de bisende ngo.

²³Man abigoyo jusend pare piny i wang’e, Man abigoyo ju m’udage.

²⁴Ento bedo mandha para ku mer mi bero para bibedo i bang’e; Man tung pare bidodre ni kum nyinga.

²⁵Abiketho cinge wi nam bende, Man cinge ma yor acwic wi kulo.

²⁶Ebiywak kumae i bang’a, In i Vwa, Munguna, man cana mi both para.

²⁷Abikethe ni kayu para bende, Malu ma sagu ju m’ubimo mi ng’om.

²⁸Abigwoko mer mi bero para ire mi nja; Man lembariba para bicungo ki kude.

²⁹Kodhi pare bende abiketho bedo mi nja, Man komker pare calu ceng’ m i polo.

³⁰Tek nyithindhe gikuno cik para, Man giwotho ngo i lembapoka para;

³¹Tek gikadhu ku wi cik para, Man giworo lembang’ola para ngo;

³²Abilund liewo kier migi kud ukede, Man dubo migi ku goc.

³³Ento abikabu mer mi bero para pet ungo kud i bang’e, Kadi bedo mandha para de abiyio ngo ya urany.

³⁴Lembariba para abituro ngo, Kadi lembe m’uai kud i dendhoga de abiloko ngo.

³⁵Wang’ acel akwong’o kwong’ ku leng’ para kumae: Abicwayu ndra ni Daudi ngo:

³⁶Kodhine bibedo mi nja, Man komker pare calu ceng’ i wang’a.

³⁷Ebicungo mi nja calu dwi, Man calu mulembe mandha i polo. [Sela.

³⁸Ento ibayu man ikwero, Kwinyo negi kum ng’atu m’iwiro peri.

³⁹Idagu lembariba pa jatic peri: Icido jamkermiwic pare ku baye i ng’om.

⁴⁰Itong’o arara pare ceke piny; Idwoko ka ma tek pare ni nyoth.

⁴¹Dhanu ceke m’ukadhu kud i yoje giyake: Edoko ni cac ni judhugola pare.

⁴²Idodo cing’ jusend pare ma yor acwic; Iketho anyong’a nego judegi pare ceke.

⁴³Eyo, iloko lak palamularu pare cen, Man iketho ecungo ngo i lwiny.

⁴⁴Irwinyo rieny pare, Man ibayu komker pare i ng’om.

⁴⁵Ijwigo ceng’ mir aradu pare: Iume ku lewic. [Sela.

⁴⁶Rokani, E Yehova? ibipondo mi nja? Kwinyo peri biwang’ calu mac rokani?

⁴⁷Poi, E Rwoth, maram nindo mi kwo nok ko, Ni kum gin ma ie nanu icwio wot dhanu!

⁴⁸Ng’atu ma kani ma bibedo kwo ma kubineno tho ngo, Ma bibodho ng’eyong’ec pare ni tego mi lieli? [Sela.

⁴⁹Rwoth, mer mi bero peri ma kwong’a ni kani, M’ikwong’o ni Daudi i bedo mandha peri?

⁵⁰Rwoth, poi kum cac mi jutic peri; Maram ayeyo ko cac mi kodhidhanu ma tek ceke i kora,

⁵¹Ma judegi peri gicayu kudo, E Yehova, Ma gicayu kudo dakutielo pa ng’atu m’iwiro peri.

⁵²Mugisa bed ni Yehova mi nja. Amen, man Amen.